پرەزيدەنت جىلىنا 70 مىڭعا جۋىق اۆتوكولىك شىعارا الاتىن زاۋىتتىڭ قۇرىلىسىمەن تانىستى
قوستاناي. KAZINFORM - مەملەكەت باسشىسى قاسىم-جومارت توقايەۆ قوستاناي وبلىسىنداعى KIA اۆتوموبيلدەرىن شىعاراتىن زاۋىتتىڭ قۇرىلىس الاڭىنا باردى.
پرەزيدەنتكە قۇرىلىس جۇمىستارى بىلتىر قازان ايىندا باستالعانى تۋرالى باياندالدى. جوسپارعا سايكەس، كونۆەيەردەن العاشقى كولىك سىناق رەجيمىندە كەلەسى جىلدىڭ شىلدە ايىندا شىعارىلادى.
KIA Qazaqstan باس ديرەكتورى كيم دە كي زاۋىت 2025 -جىلدىڭ قازان ايىندا ىسكە قوسىلاتىنىن جەتكىزدى. اۆتوكاسىپورىن باستاپقى كەزەڭدە Sorento مودەلىن شىعارۋدى جوسپارلاپ وتىر. 2026 -جىلدىڭ قاڭتار ايىنان باستاپ جاڭارتىلعان Sportage مودەلى قۇراستىرىلادى.
پرەزيدەنتكە KIA زاۋىتى جىلىنا 70 مىڭعا جۋىق اۆتوكولىك شىعارا الاتىنى جونىندە مالىمەت بەرىلدى.
كاسىپورىندا جاڭادان 1500 تۇراقتى جۇمىس ورنى اشىلادى.
مۇندا ءوندىرىستىڭ تيىمدىلىگىن ارتتىرۋعا ءارى ەكولوگيالىق تۇرعىدان زيانسىز ەتۋگە باعىتتالعان تەحنولوگيالىق شەشىمدەر قولدانىلادى.
اۆتوماتتاندىرىلعان زاماناۋي كاسىپورىننىڭ دانەكەرلەۋ جەلىسىندە، اۆتوكولىكتى بوياۋ جانە قۇراستىرۋ جۇمىستارىنا 70 روبوت پايدالانىلادى.
جوبانىڭ قۇنى 200 ميلليون دوللاردى قۇرايدى، ونىڭ 80 پايىزعا جۋىعى تىكەلەي شەتەلدىك ينۆەستيتسيانىڭ ۇلەسىندە.
سونىمەن قاتار قاسىم-جومارت توقايەۆقا جاڭا زاۋىتتىڭ جانىنان قوسالقى بولشەكتەر ءوندىرىسىنىڭ كلاستەرىن قۇرۋ جوباسى تانىستىرىلدى. بۇگىندە لوكاليزاتسيا ورتالىعىنىڭ قۇرىلىسى باستالعان. KIA كومپانياسى اۆتوكولىك كومپونەنتتەرى مەن قوسالقى بولشەكتەرىن ءوندىرۋشى جاھاندىق كومپانيالاردى تارتۋ بويىنشا جۇمىس جۇرگىزىپ جاتىر.
ك س س Corporation كومپانياسى اۆتوكولىك كومپونەنتتەرى ءبولىمىنىڭ باسقارۋشىسى پاك سەيون مەن Seoyon Ehwa Global كومپانياسى جاھاندىق بيزنەستى باسقارۋ توبىنىڭ جەتەكشىسى چانگ سەوكۆون وڭتۇستىك كورەيانىڭ وندىرۋشىلەرى قازاقستاندا ءوز ءوندىرىسىن اشۋعا ءازىر ەكەنىن ايتتى.