پرەزيدەنت «جۇمىسشى ماماندىقتارىنىڭ قالاسى» فەستيۆالىنە باردى

استانا. قازاقپارات  - EXPO كورمە الاڭىندا بولاشاق مامانداردىڭ، جۇمىس بەرۋشىلەر مەن كاسىپتىك- تەحنيكالىق ۇيىمداردىڭ باسىن قوسقان «جۇمىسشى ماماندىقتارىنىڭ قالاسى» فەستيۆالى ءوتىپ جاتىر، دەپ حابارلايدى اقوردانىڭ باسپا ءسوز قىزمەتى.

بۇل - مەملەكەت باسشىسى قاسىم-جومارت توقايەۆتىڭ باستاماسىمەن جاريالانعان «جۇمىسشى ماماندىقتارى جىلىنداعى» العاشقى اۋقىمدى ءىس- شارا.

فەستيۆال وقۋ-اعارتۋ مينيسترلىگىنىڭ ۇيىمداستىرۋىمەن جانە باسقا دا سالالىق ۆەدومستۆولاردىڭ، ۇلتتىق كومپانيالار مەن ءىرى كاسىپورىنداردىڭ قولداۋىمەن ءوتىپ جاتىر. قالاشىقتاعى 40 ينتەراكتيۆتى كورمەدە 200 دەن استام ماماندىقتىڭ قىر-سىرىنا قانىعىپ، ەكونوميكا سەكتورلارىنىڭ ەرەكشەلىكتەرىمەن تانىسۋعا بولادى. فەستيۆال اياسىندا بىرنەشە كۇن بويى ءتۇرلى سەمينارلار، شەبەرلىك ساعاتتارى، يننوۆاتسيالىق سەسسيالار مەن جۇمىس جارمەڭكەلەرى ۇيىمداستىرىلادى. العاشقى ەكى كۇندە ءىس- شاراعا 15 مىڭنان استام ادام كەلگەن.

قاسىم-جومارت توقايەۆ ەنەرگەتيكا، تاۋ-كەن، مەتاللۋرگيا، مۇناي- گاز، قۇرىلىس، اۋىل شارۋاشىلىعى جانە تاعى دا باسقا سالالارعا مامان دايارلاۋ ۇدەرىسىمەن تانىستى. سونداي-اق پرەزيدەنتكە ەڭبەك نارىعىنداعى سۇرانىسقا جانە ءار ءوڭىردىڭ ەرەكشەلىگىنە قاراي كاسىپتىك- تەحنيكالىق ءبىلىم بەرۋ ۇيىمدارىن ترانسفورماتسيالاۋ مىسالدارى باياندالدى.

پرەزيدەنت اتوم ەلەكتر ستانساسى سەكىلدى ءىرى جوبالاردى جۇزەگە اسىرۋ قارساڭىندا ساپالى ءبىلىم مەن كاسىبي داعدىنى مەڭگەرگەن ماماندار وتە قاجەت ەكەنىن ايتتى.

مەملەكەت باسشىسى «جۇمىسشى ماماندىقتارىنىڭ قالاسىن» ارالاپ كورگەن سوڭ وڭىرلەردەن كەلگەن جاستارمەن جۇزدەستى. پرەزيدەنت كەز كەلگەن ەڭبەك قادىرلى، قۇرمەتكە لايىق ەكەنىنە نازار اۋدارىپ، جاستاردى ايانباي ەڭبەك ەتۋگە شاقىردى.

ەسكە سالساق، بۇدان بۇرىن 11-اقپاندا ەلوردادا جۇمىسشى ماماندىقتارىنىڭ فەستيۆالى باستالعانىن جازدىق.