پرەزيدەنت جازۋشى يسرايل ساپاربايدىڭ وتباسىنا كوڭىل ايتتى

استانا. KAZINFORM - مەملەكەت باسشىسى اقىن، قازاقستاننىڭ ەڭبەك سىڭىرگەن قايراتكەرى يسرايل ساپاربايدىڭ وتباسىنا كوڭىل ايتۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.

پرەزيدەنت قاسىم-جومارت توقايەۆ كورنەكتى اقىن، سازگەر، قازاقستاننىڭ حالىق جازۋشىسى، «پاراسات» وردەنىنىڭ يەگەرى يسرايل ساپاربايدىڭ دۇنيەدەن وتۋىنە بايلانىستى وتباسى مەن جاقىن تۋىستارىنا كوڭىل ايتتى.

- يسرايل ساپارباي عيبراتتى عۇمىرىن كيەلى ءسوز ونەرىنە ارناعان، ءتول ادەبيەتىمىزدىڭ كوكجيەگىن كەڭەيتۋگە زور ۇلەس قوسقان دارىندى قالامگەر ەدى. ۇلتتىق پوەزيا مەن دراماتۋرگيادا وزىندىك قولتاڭباسىن قالدىرىپ، ناعىز شىعارماشىل تۇلعا رەتىندە ءونىمدى ەڭبەك ەتتى. قالىڭ وقىرمان ومىرشەڭ تۋىندىلارىمەن قاتار ۇلتجاندى ازاماتتىعىن جوعارى باعالادى. سوڭىنا باي ادەبي-مادەني مۇرا قالدىرعان يسرايل ساپاربايدىڭ جارقىن بەينەسى مەن ەسىمى ۇمىتىلمايدى، - دەپ جازىلعان جەدەلحاتتا.

بۇعان دەيىن قازاقستاننىڭ حالىق جازۋشىسى، اسا كورنەكتى ۇلت اقىنى، تالانتتى سازگەر يسرايل ساپارباي 85 جاسىنا قاراعان شاعىندا قايتىس بولعانىن جازعانبىز.