پرەزيدەنت جاساندى ينتەللەكتىنى دامىتۋ كەڭەسىنىڭ العاشقى وتىرىسىن اشتى

استانا. KAZINFORM - ەلوردادا مەملەكەت باسشىسىنىڭ توراعالىعىمەن جاساندى ينتەللەكتىنى دامىتۋ جونىندەگى كەڭەستىڭ العاشقى وتىرىسى باستالدى.

بۇل كەڭەس ج ي، عىلىمي زەرتتەۋ مەن سيفرلىق تەحنولوگيا سالاسىندا قازاقستاننىڭ ورتالىق ازياداعى جەتەكشى ويىنشى رەتىندە ستراتەگيالىق دامۋىنىڭ ماڭىزدى قادامى بولماق.

جاساندى ينتەللەكتىنى دامىتۋ جونىندەگى كەڭەس پرەزيدەنت جارلىعىمەن قۇرىلعان جانە ول - ەلدەگى ج ي دامىتۋدىڭ ستراتەگياسىن قالىپتاستىراتىن، تەحنولوگيالاردى ەكونوميكانىڭ نەگىزگى سالالارى مەن مەملەكەتتىك باسقارۋعا ەنگىزۋدى سۇيەمەلدەيتىن، سونداي-اق سالالىق باعدارلامالار مەن ستراتەگيالىق قۇجاتتارعا ۇسىنىستار ازىرلەيتىن كەڭەسشى-كونسۋلتاتيۆتىك ورگان.

- ەڭ الدىمەن استاناعا ارنايى كەلگەن كەڭەس مۇشەلەرىنە شىنايى ريزاشىلىعىمدى بىلدىرەمىن. بۇگىنگى باسقوسۋ «ءبىلىم بەرۋ سالاسىنداعى جاساندى ينتەللەكت: مول مۇمكىندىكتەر جانە سىن- قاتەرلەر» دەگەن تاقىرىپپەن وتەدى. ءبىلىم-عىلىم سالاسى ستراتەگيالىق سالا. سوندىقتان ەڭ الدىمەن وسى باعىتتا پىكىر الماسىپ، وي بولىسەمىز، - دەدى قاسىم-جومارت توقايەۆ وتىرىستىڭ اشىلۋىندا.

ءبىرىنشى وتىرىسقا قازاقستان ۇكىمەتىنىڭ وكىلدەرى، ونىڭ ىشىندە پرەمەر-مينيستر مەن سالالىق مينيسترلەر، سونداي-اق الەمنىڭ جەتەكشى ۋنيۆەرسيتەتتەرى مەن كومپانيالارىنان حالىقارالىق ساراپشىلار مەن عالىمدار قاتىسىپ وتىر. ولاردىڭ قاتارىندا ب ا ءا، ا ق ش جانە قىتاي ماماندارى بار.

كەڭەستە ادامي كاپيتالدى دامىتۋ جانە ءبىلىم بەرۋ سالاسىندا جاساندى ينتەللەكتىنى پايدالانۋ ماسەلەلەرى قاراستىرىلادى. ج ي-دىڭ وقۋ پروتسەسىندەگى رولىنە، مامانداردى دايارلاۋعا جانە ەكونوميكانىڭ ءتۇرلى سالالارىنا ەنگىزىلۋىنە ەرەكشە نازار اۋدارىلادى.

سونىمەن بىرگە، وتىرىس اياسىندا مەملەكەت باسشىسى سيفرلىق شەشىمدەر كورمەسىن ارالادى.

ايتا كەتەيىك، مەملەكەت باسشىسى بيىلعى جولداۋىندا جاساندى ينتەللەكتتى بارلىق سالاعا ەنگىزۋ باستاماسىن كوتەردى.

جۋىردا جاسلان ماديەۆ ق ر پرەمەر-ءمينيسترىنىڭ ورىنباسارى - جاساندى ينتەللەكت جانە سيفرلىق دامۋ ءمينيسترى بولىپ تاعايىندالدى.