پرەزيدەنت جاڭا ۇكىمەتكە قانداي مىندەتتەر جۇكتەدى
استانا. KAZINFORM - پرەزيدەنت قاسىم-جومارت توقايەۆ ءماجىلىستىڭ جالپى وتىرىسىندا جاڭادان جاساقتالاتىن ۇكىمەتتىڭ الدىندا تۇرعان مىندەتتەردى اتادى.
«قۇرمەتتى دەپۋتاتتار، بارشاڭىزعا ءمالىم، بۇگىنگى قازاقستان حالىقارالىق قوعامداستىقتا ابىروي- بەدەلى بار مەملەكەت. بۇل - ەلىمىز ءۇشىن زور جەتىستىك دەپ سەنىممەن ايتۋعا بولادى. شەتەل ساياساتكەرلەرى جانە ساراپشىلارى قازاقستان ورتالىق ازيادا الەۋمەتتىك- ەكونوميكالىق دامۋ قارقىنى جانە جالپى ەكونوميكانىڭ كولەمى بويىنشا كوش باستاپ تۇرعانىن مويىندايدى»، - دەدى مەملەكەت باسشىسى.
پرەزيدەنت قازىر ۇكىمەتكە بوساڭسيتىن كەز ەمەس ەكەنىن ەسكە سالدى.
«ءبىراق ءبىز ەلىمىزدىڭ الەۋەتىن ودان ءارى ارتتىرۋمىز كەرەك. بۇل الدىمىزدا تۇرعان بيىك ماقسات. سوندىقتان بوساڭسۋعا بولمايدى. باسقا سوزبەن ايتقاندا، ۇزاقمەرزىمدى ستراتەگيالىق ماقساتتارعا قول جەتكىزۋ ءۇشىن مۇنىڭ ءبارى جەتكىلىكسىز ەكەنى انىق. قازاقستاندى وزىق ەلگە اينالدىرۋىمىز كەرەك. بۇل جاي ۇران ەمەس. بۇل - ءبىزدىڭ ناقتى جوسپارىمىز. بىزگە كەرەگى - دامۋدىڭ سارا جولى. سوندىقتان تۇبەگەيلى ساياسي رەفورمالار جۇرگىزۋمەن قاتار ەلىمىزدىڭ قوعامدىق-ەكونوميكالىق ومىرىندە تەرەڭ وزگەرىستەر جاساۋ ءۇشىن باتىل شارالار قابىلداۋىمىز قاجەت. ەڭ باستىسى، ءبىزدىڭ بارلىق ءىس- ارەكەتىمىز ادىلەتتى قازاقستان قۇرۋ قاعيداتىنا ساي بولۋعا ءتيىس»، - دەدى قاسىم-جومارت توقايەۆ.
ايتا كەتەيىك، كەشە مەملەكەت باسشىسى ۇكىمەتتى وتستاۆكاعا جىبەردى.