پرەزيدەنت حالىقارالىق ەڭبەك ۇيىمىنىڭ باسشىسى جيلبەر ۋنگبومەن كەزدەستى
استانا. KAZINFORM - قاسىم-جومارت توقايەۆ جيلبەر ۋنگبوعا ءىلتيپات ءبىلدىرىپ، ونىڭ بۇل ساپارى قازاقستان مەن حالىقارالىق ەڭبەك ۇيىمىنىڭ اراسىنداعى ىنتىماقتاستىققا تىڭ سەرپىن بەرۋ تۇرعىسىنان اسا ماڭىزدى ەكەنىن ايتتى.
پرەزيدەنت حالىقارالىق ەڭبەك ۇيىمىنىڭ الەۋمەتتىك ادىلدىك قاعيداتتارىن جاھاندىق اۋقىمدا دامىتۋداعى رولىنە توقتالدى.
- ءبىز ادىلەتتى قازاقستاندى قۇرىپ جاتىرمىز. بۇل تۇجىرىمداما سىزدەردىڭ الەۋمەتتىك ادىلدىك باستامالارىڭىزبەن ۇندەس. حالىقارالىق ەڭبەك ۇيىمىنىڭ سەنىمدى ءارى ءادىل، ءتيىمدى الەۋمەتتىك كەلىسىمدى قامتاماسىز ەتۋ، سونداي-اق ەڭبەككەرلەردىڭ قۇقىعىن ىلگەرىلەتۋ ىسىندەگى ميسسياسى ەشقانداي تالاس تۋدىرمايدى. قازاقستان ۇيىمنىڭ 25 نەگىزگى كونۆەنتسياسىن راتيفيكاتسيالادى. بۇل جۇمىس جالعاسا بەرەدى،- دەدى پرەزيدەنت.
مەملەكەت باسشىسى ازاماتتاردىڭ ءال-اۋقاتىن ارتتىرۋ، زاڭ ۇستەمدىگى مەن ادام قۇقىعىن قورعاۋ باعىتىندا قازاقستاندا اتقارىلىپ جاتقان جۇمىستار جايىندا مالىمەت بەردى.
جيلبەر ۋنگبو قاسىم-جومارت توقايەۆتىڭ باسشىلىعىمەن ادىلەتتى قازاقستاندى قۇرۋ جولىندا جۇرگىزىلىپ جاتقان اۋقىمدى رەفورمالاردى جوعارى باعالادى.
بۇدان بولەك، پرەزيدەنتكە ۇكىمەت مۇشەلەرىمەن ناتيجەلى كەزدەسۋلەر وتكەنىن جانە حالىقارالىق ەڭبەك ۇيىمىنىڭ ماقسات-مىندەتتەرىن ىلگەرىلەتۋ ماسەلەسىندە قازاقستاننىڭ ايماقتا كوشباسشى ەكەنىن اتاپ ءوتتى.
-ءسىزدىڭ ەلىڭىز الەۋمەتتىك، ەڭبەك جاعدايىن جاقسارتۋعا ايتارلىقتاي كۇش سالىپ وتىر. بۇل ءبىزدىڭ ۇيىمنىڭ الەۋمەتتىك ادىلدىك ءۇشىن جاھاندىق كواليتسياسى اياسىنداعى باستامالارىنا ساي كەلەدى،- دەدى حالىقارالىق ەڭبەك ۇيىمىنىڭ باس ديرەكتورى.
قاسىم-جومارت توقايەۆ پەن جيلبەر ۋنگبو قازاقستاننىڭ الەۋمەتتىك ساياساتىن نىعايتۋعا باعىتتالعان شارالاردى ىنتىماقتاسا وتىرىپ جۇزەگە اسىرۋعا جانە حالىقارالىق ەڭبەك ۇيىمىمەن ءوزارا ءتيىمدى سەرىكتەستىكتى دامىتۋعا كەلىستى.