پرەزيدەنت دوڭگەلەك شىعاراتىن كاسىپورىنعا باردى

استانا. KAZINFORM - قاراعاندى وبلىسىنا جۇمىس ساپارى اياسىندا قاسىم-جومارت توقايەۆ ساران قالاسىنداعى كولىك دوڭگەلەكتەرىن شىعاراتىن KamaTyresKZ زاۋىتىن ارالاپ كوردى. پرەزيدەنتكە كاسىپورىننىڭ ءوندىرىس سيكلى مەن دامۋ پەرسپەكتيۆاسى تانىستىرىلدى.

مەملەكەت باسشىسىنا «تاتنەفت» ج ا ق باس ديرەكتورى نايل ماگانوۆ پەن KamaTyresKZ زاۋىتىنىڭ ديرەكتورى رادي بۋرگانوۆ قۇرىلىس- مونتاج جۇمىستارى اياقتالىپ، تەحنولوگيالىق قۇرال-جابدىقتار تولىقتاي جەتكىزىلگەنىن ايتتى. 234 ميلليارد تەڭگە كولەمىندە ينۆەستيتسيا سالىنعان زاۋىتتا ءونىمنىڭ سەريالىق ءوندىرىسى باستالدى. وتكەن ايدا KamaTyresKZ 30 مىڭ دوڭگەلەك شىعارعان. زاۋىت العاشقى جىلى ءونىم كولەمىن 1 ميلليونعا دەيىن جەتكىزە الادى.

پرەزيدەنتكە دوڭگەلەك قۇراستىراتىن سەحتار مەن ءوندىرىس جەلىلەرى تانىستىرىلدى. زاۋىتتىڭ قۇرال- جابدىعى لاتۆيا، يتاليا، پورتۋگاليا، جاپونيادان جانە تاعى دا باسقا ەلدەردەن اكەلىنگەن. جالپى كاسىپورىندا 800 گە جۋىق تەحنولوگيالىق قۇرىلعى ورناتىلعان.

زاۋىت 2027 -جىلعا قاراي 3,5 ميلليون دوڭگەلەك شىعارادى دەپ جوسپارلانىپ وتىر. قازىرگى كەزدە كاسىپورىندا 590 جۇمىسشى ەڭبەك ەتىپ جاتىر. كەلەشەكتە قىزمەتكەرلەر سانى 1125 ادامعا دەيىن كوبەيەدى. ءوندىرىس جۇمىسشىلارى «تاتنەفت» كومپانيالار توبىنىڭ دوڭگەلەك شىعاراتىن كاسىپورىندارىندا وقۋ- تاجىريبەدەن وتكەن.

زاۋىت ءونىمى Attar برەندىمەن تانىلادى جانە حالىقارالىق ستاندارتتارعا ساي سەرتيفيكات يەلەنگەن. وتاندىق دوڭگەلەكتەر شىلدە ايىنان قازاقستان مەن شەت مەملەكەتتەردىڭ نارىعىندا ساتىلا باستادى. بيىل ەلىمىزدە قۇراستىرىلاتىن JAC ماركالى اۆتوموبيلدەر كونۆەيەردەن Attar دوڭگەلەكتەرىمەن شىعادى.