پرەزيدەنت دۇنيەجۇزىلىك كليمات سامميتىندە ۇسىنىلعان قازاقستان پاۆيلونىنا باردى
استانا. KAZINFORM - قاسىم-جومارت توقايەۆ СOP29دۇنيەجۇزىلىك كليمات سامميتىندە ۇسىنىلعان قازاقستاننىڭ ەكسپوزيتسياسىمەن تانىستى، دەپ حابارلايدى اقوردا.
كورمە ەلىمىزدىڭ مادەنيەتىن، يننوۆاتسيالىق جانە ەكولوگيالىق جوبالارىن پاش ەتەدى. كەڭىستىك تابيعي ماتەريالداردى پايدالانا وتىرىپ ەتنوستيلدە بەزەندىرىلگەن. وسىلايشا ۇيىمداستىرۋشىلار حالقىمىزدىڭ ءداستۇردى بەرىك ساقتايتىنىن ءارى ەكولوگيالىق ۇستانىمدى قولدايتىنىن كورسەتكەن.
پرەزيدەنتكە جاسىل سۋتەگىن وندىرەتىن Hyrasia One بولاشاق زاۋىتىنىڭ ماكەتى تانىستىرىلدى.
بۇدان كەيىن مەملەكەت باسشىسىنا گۇلفيا مەلدەشتىڭ سايعاق مۇسىندەرى جانە وتاندىق ەكولوگيالىق ونىمدەر كورسەتىلدى.
پاۆيلونعا كەلۋشىلەر قازاقستاننىڭ بيوالۋانتۇرلىلىگى، سونداي-اق سيرەك كەزدەسەتىن نەمەسە جويىلىپ كەتۋ قاۋپى ءتونىپ تۇرعان تۇران جولبارىسى، پرجيەۆالسكي جىلقىسى، كيىك جانە قار بارىسى سەكىلدى ءتۇز تاعىلارىن قايتا كوبەيتۋ ماقساتىندا ەلىمىزدە قابىلدانعان شارالار جونىندە ماعلۇمات الادى.
ەسكە سالايىق، پرەزيدەنت قاسىم-جومارت توقايەۆ دۇنيەجۇزىلىك كليمات سامميتىنە قاتىسۋ ءۇشىن باكۋدەگى وليمپيادالىق ستاديونعا باردى. سوسىن مەملەكەت باسشىسى باكۋدەگى دۇنيەجۇزىلىك كليمات سامميتىندە ءسوز سويلەدى.