پرەزيدەنت دەنساۋلىق ساقتاۋ ءمينيسترى اقمارال ءالنازاروۆانى قابىلدادى
استانا. KAZINFORM - مەملەكەت باسشىسى دەنساۋلىق ساقتاۋ ءمينيسترى اقمارال ءالنازاروۆانى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
اقمارال ءالنازاروۆا ۆەدومستۆونىڭ جۇمىسى جانە دەنساۋلىق ساقتاۋ جۇيەسىن دامىتۋ جوسپارلارى تۋرالى باياندادى. قازىرگى ۋاقىتتا بولجامدى ءومىر ءسۇرۋ ۇزاقتىعىنىڭ كورسەتكىشى 75 جاستان اساتىنى جونىندە ايتتى. جىل باسىنان بەرى ينفەكتسيالىق اۋرۋلاردىڭ 21 ءتۇرى بويىنشا، سونىڭ ىشىندە كوروناۆيرۋسپەن سىرقاتتانۋ كورسەتكىشتەرى تومەندەگەن. ۆاكسيناتسيالاۋ جانە پروفيلاكتيكالىق ءىس-شارالاردى جۇرگىزۋ جۇمىستارى جالعاسىپ جاتىر.
مەديتسينالىق قىزمەتتىڭ ساپاسىن جانە قولجەتىمدىلىگىن ارتتىرۋعا باسا نازار اۋدارىلعانى تۋرالى ەسەپ بەردى. العاشقى جانە ستاتسيونارلىق مەديتسينالىق كومەكتى ۇيىمداستىرۋدىڭ تاسىلدەرى قايتا قارالىپ جاتىر. سونداي-اق دياگنوستيكالىق جانە ەمدەۋ ستاندارتتارى جاڭارتىلىپ، سالانىڭ كادرلىق الەۋەتى نىعايىپ كەلەدى.
ءدارى-دارمەك پەن مەديتسينالىق بۇيىمداردى ساتىپ الۋ جۇيەسىنىڭ تيىمدىلىگى مەن اشىقتىعى قامتاماسىز ەتىلىپ جاتقانى تۋرالى ايتتى. بۇدان بولەك، مەديتسينالىق مەكەمەلەر جۇمىسىنىڭ تيىمدىلىگىن ارتتىرىپ، مىندەتتى الەۋمەتتىك مەديتسينالىق ساقتاندىرۋعا باقىلاۋدى جاقسارتۋ ءۇشىن زاماناۋي سيفرلىق تەحنولوگيالار ازىرلەنگەن. ولار قولدانىسقا ەنگىزىلىپ جاتىر.
جاڭا مەديتسينالىق نىساندار سالۋ جانە سالا قىزمەتتەرىنىڭ ساپاسىن ودان ءارى ارتتىرۋ ماسەلەلەرى قامتىلعان دەنساۋلىق ساقتاۋ ينفراقۇرىلىمىن دامىتۋدىڭ 2025-2030-جىلدارعا ارنالعان ستراتەگيالىق جوسپارى تۋرالى اقپارات بەردى. قابىلدانعان وسى تۇجىرىمداما اياسىندا دەنساۋلىق ساقتاۋ ۇيىمدارىنىڭ وڭتايلى جانە ءتيىمدى جەلىسىن قۇرۋعا باعىتتالعان 34 نەگىزگى جوبانى ىسكە اسىرۋ جوسپارلانىپ وتىر.
كەزدەسۋ سوڭىندا مەملەكەت باسشىسى انا مەن بالا ءولىمىنىڭ كورسەتكىشتەرىن تومەندەتۋ بويىنشا جۇمىستى جالعاستىرۋ قاجەت ەكەنىن اتاپ ءوتتى. سونىمەن قاتار مەديتسينالىق كومەك كورسەتۋدىڭ مەيلىنشە ناتيجەلى بولۋىنا نازار اۋدارا وتىرىپ، دەنساۋلىق ساقتاۋ جۇيەسىن ساپالى تۇردە قايتا قۇرۋ كەرەكتىگىنە توقتالدى. سونداي- اق سالاعا، ونىڭ ىشىندە ءدارى-دارمەككە بولىنەتىن قاراجاتتىڭ اشىقتىعى مەن تيىمدىلىگىن قامتاماسىز ەتۋ جونىندە مىندەتتەر جۇكتەدى.