پرەزيدەنت ءىس باسقارماسى تۋرنيرى اياسىندا قازاق كۇرەسىنەن مىقتىلار انىقتالدى
استانا. KAZINFORM - ەلورداداعى «Qazaqstan» جەڭىل اتلەتيكا سپورت كەشەنىندە ق ر پرەزيدەنتى ءىس باسقارماسى قىزمەتكەرلەرىنىڭ اراسىندا قازاق كۇرەسىنەن وتكەن تۋرنير مارەسىنە جەتتى.
اتاپ ايتقاندا، جىل سايىن پرەزيدەنت ءىس باسقارماسى جۇيەسىندەگى بارلىق مەكەمەلەردىڭ قاتىسۋىمەن ءبىرقاتار سپورت تۇرىنەن ءداستۇرلى جارىستار ۇيىمداستىرىلىپ كەلەدى. بۇگىنگى سايىسقا باسقارمانىڭ ءتۇرلى بولىمشەلەرىنەن كەلگەن 50 دەن استام بالۋان بوز كىلەمدە باق سىناستى.
تۋرنيردىڭ اشىلۋىندا ق ر پرەزيدەنتى ءىس باسقارماسى اپپاراتىنىڭ باسشىسى سەرىك كەنجەبايەۆ جارىس رەسپۋبليكا كۇنىنە وراي وتكىزىلىپ جاتقانىن اتاپ ءوتتى.
«قازاق كۇرەسى ادامنىڭ كۇش-جىگەرى مەن ەپتىلىگىن كورسەتەدى، سونداي-اق بۇل سپورت ەرلىك پەن توزىمدىلىكتىڭ، قارسىلاسقا دەگەن قۇرمەتتىڭ كورىنىسى. قازاق كۇرەسى - وتە تارتىمدى سپورت ءتۇرى. بيىل ەلىمىزدە V دۇنيەجۇزىلىك كوشپەندىلەر ويىندارى ءوتتى. سونىڭ ناتيجەسىندە قازاق كۇرەسى وتە تانىمال ەكەنىنە كوزىمىز جەتتى. بۇل تۇرعىدا قازاق كۇرەسى قاتىسۋشى ەڭ كوپ تىركەلگەن سپورت ءتۇرى اتاندى»، - دەدى س. كەنجەبايەۆ.
ءوز كەزەگىندە پرەزيدەنت ءىس باسقارماسى ۇيىمداستىرۋ-باقىلاۋ جانە كادر جۇمىسى ءبولىمىنىڭ باسشىسى ەربول ادايەۆ بۇگىنگى جارىس وتە تارتىستى وتكەنىن، سونداي-اق پرەزيدەنت ءىس باسقارماسى وسىنداي ءداستۇرلى تۋرنيرلەردى ۇيىمداستىرۋدى جالعاستىرا بەرەتىنىن ايتتى.
تۋرنيرگە قازاق كۇرەسى قاۋىمداستىعىنىڭ كاسىبي تورەشىلەرى قازىلىق ەتتى. جارىستىڭ باس تورەشىسى، قازاق كۇرەسى قاۋىمداستىعىنىڭ مەنەدجەرى ءابدىراحمان سامىراتتىڭ ايتۋىنشا، بۇگىنگى تۋرنير جوعارى دەڭگەيدە ۇيىمداستىرىلدى.
«82 كەلىگە دەيىنگى جانە 82 كەلىدەن جوعارى سالماق دارەجەسىندە بالۋاندار قاتىستى. جارىسقا كەلگەن 53 سپورتشىنىڭ دايىندىعىن جاقسى دەپ باعالايمىن. ولار كاسىبي سپورتشى بولماسا دا، تۋرنيرگە تياناقتى دايىندالعانىن كورىپ وتىرمىز. بىلتىر دا ق ر پرەزيدەنتى ءىس باسقارماسى قىزمەتكەرلەرىنىڭ جارىسى بولعان. وسىنداي تۋرنيرلەردى ءداستۇرلى تۇردە وتكىزۋدىڭ ارقاسىندا بالۋانداردىڭ كۇرەس دەڭگەيى ءوسىپ كەلە جاتىر دەپ ايتا الامىن. جالپى، مۇنداي ءىس-شارالار ەلىمىزدە سپورتتىڭ دامۋىنا ەلەۋلى ۇلەسىن قوسادى. بۇگىن سپورت كەشەنىنە اكەلەرىنە، اعالارىنا، تۋستارىنا جانكۇيەر رەتىندە ءبىراز بالا كەلگەنىن كورىپ وتىرمىن. ولار وسىنى كورىپ، وسە كەلە قازاق كۇرەسىنە بارادى»، - دەدى ءا. سامىرات.
ءتورت ساعاتقا جۋىق ۋاقىتقا سوزىلعان تارتىستى تۋرنيردىڭ قورىتىندىسى مىنانداي:
82 كەلىگە دەيىنگى سالماق دارەجەسى:
3-ورىن - نۇربولات قۇلمانوۆ (ق ر پرەزيدەنتى تەلەراديوكەشەنى)؛
2-ورىن - مەرەكە مۇرات (پرەزيدەنت اكىمشىلىگى مەن ۇكىمەتىنىڭ اكىمشىلىك عيماراتتارى ديرەكسياسى)؛
1-ورىن - رايىمبەك جۇلماعامبەتوۆ (مەملەكەتتىك رەزيدەنتسيالار ديرەكسياسى).
82 كەلىدەن جوعارى سالماق دارەجەسى:
3-ورىن - باقتيار سەرىكباي (پرەزيدەنت ءىس باسقارماسى)؛
2-ورىن - ەسەن تۇگەلباي (پرەزيدەنت اكىمشىلىگى مەن ۇكىمەتىنىڭ اكىمشىلىك عيماراتتارى ديرەكسياسى)؛
1-ورىن - امان تۇگەلباي (پرەزيدەنت اكىمشىلىگى مەن ۇكىمەتىنىڭ اكىمشىلىك عيماراتتارى ديرەكسياسى).
سونىمەن قاتار تۋرنير اياسىندا «ەڭ ەرەسەك بالۋان» اتالىمىندا كەڭەس ءمۇساپىروۆ (م ت ق ب اۆتوشارۋاشىلىعى) ماراپاتتالدى.
وسىعان دەيىن الەمنىڭ 40 تان استام ەلىندە قازاق كۇرەسى دامىپ جاتقانىن جازعان ەدىك.
ايتا كەتەيىك، بيىل قازاق كۇرەسى 5- دۇنيەجۇزىلىك كوشپەندىلەر ويىندارىنداعى قاتىسۋشى ەڭ كوپ تىركەلگەن سپورت ءتۇرى اتاندى. ەكى كۇنگە سوزىلعان جارىستارعا 41 ەلدەن كەلگەن 274 سپورتشى قاتىسىپ، 16 سالماق دارەجەسىندە مەدالدار جيىنتىعى ساراپقا سالىندى.