پرەزيدەنت ءبىر اپتادا 3 ءىرى جيىن، 8 كەزدەسۋ وتكىزدى - رۋسلان جەلدىباي
استانا. KAZINFORM - مەملەكەت باسشىسى قاسىم-جومارت توقايەۆتىڭ جۇمىس اپتاسى وتە قاۋىرت بولدى، دەپ حابارلايدى ق ر پرەزيدەنتىنىڭ كەڭەسشىسى –باسپا ءسوز حاتشىسى رۋسلان جەلدىباي.
ونىڭ سوزىنشە، اپتا قۇقىق قورعاۋ ورگاندارىنىڭ كەڭەيتىلگەن القا ماجىلىسىنەن باستالدى. پرەزيدەنت «زاڭ مەن ءتارتىپ» قاعيداتىنا ساي قوعامدا قۇقىقتىق مادەنيەت قالىپتاستىرۋ ماسەلەسىن كوتەرىپ، كۇشتىك قۇرىلىمدار مەن قۇقىق قورعاۋ ورگاندارىنىڭ جۇمىسىن ودان ءارى جەتىلدىرۋدىڭ نەگىزگى باعىتتارىن ايقىندادى.
مەملەكەت باسشىسى «ەگمونت» قارجىلىق بارلاۋ بولىمشەلەرى توبىنىڭ ءتوراعاسى ەلجبەتا فرانكوۆ-ياسكيەۆيچتى قابىلداپ، سول كۇنى كەشكە پوليتسيا كۇنىنە ارنالعان كونسەرتتى تاماشالادى.
24-ماۋسىمدا قاسىم-جومارت توقايەۆتىڭ توراعالىعىمەن شەتەلدىك ينۆەستورلار كەڭەسىنىڭ 37- پلەنارلىق وتىرىسى ءوتتى. جيىندا پرەزيدەنت ينۆەستورلارعا جاسالاتىن قولايلى جاعداي مەن جەڭىلدىكتەرگە توقتالىپ، ەكونوميكالىق ءوسىم اكەلەتىن الەۋەتتى سالالارعا نازار اۋداردى. ءىس-شارا اياسىندا قاسىم-جومارت توقايەۆ ەۋروپالىق قايتا قۇرۋ جانە دامۋ بانكىنىڭ پرەزيدەنتىمەن، سونداي-اق ەلىمىزگە ينۆەستيتسيا سالعان ءبىرقاتار شەتەلدىك كومپانيا جەتەكشىلەرىمەن كەزدەسىپ، بىرلەسكەن جوبالاردىڭ جۇزەگە اسىرىلۋ بارىسىن تالقىلادى. تۇستەن كەيىن مەملەكەت باسشىسى باق سالاسى قىزمەتكەرلەرىن ماراپاتتادى. سونىمەن قاتار سوت جۇيەسى قىزمەتىنىڭ بيىلعى بەس ايداعى قورىتىندىسى جونىندە جوعارعى سوت ءتوراعاسى اسلامبەك مەرعاليەۆتىڭ ەسەبىن تىڭدادى.
25-ماۋسىم كۇنى پرەزيدەنت اقتوبە وبلىسىنا ساپارمەن باردى. قاسىم-جومارت توقايەۆ كەڭەس وداعىنىڭ باتىرى ءاليا مولداعۇلوۆانىڭ اقتوبە قالاسىنداعى مەموريالدىق ەسكەرتكىش كەشەنىنە گۇل شوعىن قويىپ، رۋحىنا تاعزىم ەتتى. سودان كەيىن مەملەكەت باسشىسى XI «ايبىن» حالىقارالىق اسكەري-پاتريوتتىق جاستار جيىنىن اشتى. قازاقتىڭ قايسار قىزى ءاليا مولداعۇلوۆانىڭ 100 جىلدىق مەرەيتويى مەن ۇلى جەڭىستىڭ 80 جىلدىعىنا ارنالعان جيىنعا بيىل ءوز ورەندەرىمىزبەن قاتار دوستاس رەسەي، قىرعىزستان، وزبەكستان، بەلارۋس جانە ازەربايجان ەلدەرىنەن 800 گە جۋىق جاس قاتىستى.
26-27-ماۋسىم كۇندەرى حالىقارالىق ءىس-شارالارمەن جالعاستى. پرەزيدەنت قاسىم-جومارت توقايەۆ iv ەۋرازيالىق ەكونوميكالىق فورۋمعا جانە جوعارى ەۋرازيالىق ەكونوميكالىق كەڭەس وتىرىسىنا قاتىسۋ ءۇشىن بەلارۋس استاناسىنا ساپارلادى. مينسك تورىندەگى فورۋمدا مەملەكەت باسشىسى سيفرلىق تەحنولوگيالار مەن جاساندى ينتەللەكتىنىڭ كەلەشەگى جونىندە وي-پىكىر ءبىلدىرىپ، وسى ستراتەگيالىق ماڭىزدى سالاداعى الەۋەتتى نىعايتۋ ءۇشىن ەلىمىزدە اتقارىلىپ جاتقان شارالارعا توقتالدى. ج ە ە ك- ءتىڭ كەزەكتى وتىرىسىندا ەكونوميكالىق ينتەگراتسيانى ودان ءارى دامىتۋ پەرسپەكتيۆاسى، سونداي-اق بىرلەستىكتىڭ نەگىزگى سەرىكتەستەرىمەن ساۋدا-ەكونوميكالىق ىنتىماقتاستىق ماسەلەلەرى تالقىلاندى.
مەملەكەت باسشىسى سەنبى كۇنى دە جۇمىس ىستەدى. ۋولتەر ەدۋارد دەندي اتىنداعى نەيروحيرۋرگيا قوعامداستىعىنىڭ دۇنيەجۇزىلىك X كونگرەسىنە قاتىسۋ ءۇشىن استاناعا كەلگەن بەلگىلى مەديتسينا ماماندارىمەن كەزدەستى.
- جالپى، پرەزيدەنت ءبىر اپتا ىشىندە 3 ءىرى جيىن، 8 كەزدەسۋ وتكىزدى. ءبىر مارتە وڭىرگە ساپارلاپ، شەتەلدە وتكەن 3 حالىقارالىق ءىس- شاراعا قاتىستى. سونداي-اق اپتا ىشىندە قاسىم-جومارت توقايەۆ ليۋكسەمبۋرگ، سلوۆەنيا، موزامبيك ەلدەرىنىڭ باسشىلارىنا قۇتتىقتاۋ حاتىن جولداپ، قاتار مەملەكەتىنىڭ امىرىمەن تەلەفون ارقىلى سويلەستى، - دەپ اتاپ ءوتتى رۋسلان جەلدىباي Telegram-داعى پاراقشاسىندا.
بۇدان بۇرىن بۇقارالىق اقپارات قۇرالدارى قىزمەتكەرلەرى كۇنى اياسىندا پرەزيدەنت قاسىم-جومارت توقايەۆتىڭ اتىنان «دارا» پرەزيدەنتتىك باستامالار قورى قازاقستاننىڭ جەتەكشى مەديا ۇيىمدارىنىڭ قىزمەتكەرلەرىنە پاتەر سەرتيفيكاتتارىن تابىستادى.