پرەزيدەنت ءبىلىم العان قىتايلىق ۋنيۆەرسيتەتتىڭ فيليالى استانادا اشىلادى
استانا. KAZINFORM – ق ر عىلىم جانە جوعارى ءبىلىم ءمينيسترى ساياسات نۇربەك بەيجىڭ ءتىل جانە مادەنيەت ۋنيۆەرسيتەتىنىڭ استاناداعى فيليالى اشىلاتىنىن مالىمدەدى. بۇل ج و و- دا پرەزيدەنت قاسىم-جومارت توقايەۆ قىتاي ءتىلىن ۇيرەنگەن.
«ق ح ر ءتوراعاسىنىڭ ساپارى اياسىندا بىزدە بەيجىڭ ءتىل جانە مادەنيەت ۋنيۆەرسيتەتىنىڭ فيليالى اشىلادى. بۇل - قىتايدىڭ لينگۆيستيكالىق، اۋدارما جانە پەداگوگيكالىق جەتەكشى ۋنيۆەرسيتەتى. ونى «قىتايداعى ب ۇ ۇ» دەپ تە اتايدى. بۇل ۋنيۆەرسيتەتتىڭ باس تۇلەگى - ءبىزدىڭ پرەزيدەنت قاسىم-جومارت كەمەل ۇلى. پرەزيدەنت سول جەردە قىتاي ءتىلىن ۇيرەنگەن. رەسمي اشىلۋ شىلدە ايىنىڭ باسىندا بولادى جانە مۇندا العاشقى HSK سەرتيفيكاتتاۋ ورتالىعى اشىلادى. بۇل - TOEFL نەمەسە IELTS سياقتى قىتايلىق سەرتيفيكات. سوندىقتان قىتاي ءتىلىن ۇيرەنەتىندەرگە ەشقايدا بارۋدىڭ قاجەتى جوق، استانادا سىناق تاپسىرا الادى»، - دەدى مينيستر ساياسات نۇربەك.
ايتا كەتەيىك، جاڭا ۋنيۆەرسيتەت فيليالى ەكسپو اۋماعىندا ورنالاسقان.
اۆتور
ايجان سەرىكجان قىزى