پرەزيدەنت ءاليا مولداعۇلوۆانىڭ مەموريالدىق ەسكەرتكىش كەشەنىنە گۇل شوعىن قويدى
استانا. KAZINFORM - پرەزيدەنت قاسىم-جومارت توقايەۆ كەڭەس وداعىنىڭ باتىرى ءاليا مولداعۇلوۆانىڭ مەموريالدىق ەسكەرتكىش كەشەنىنە گۇل شوعىن قويىپ، ونىڭ رۋحىنا ءبىر مينۋت ۇنسىزدىكپەن تاعزىم ەتتى.
بۇل تۋرالى اقوردانىڭ باسپا ءسوز قىزمەتى حابارلادى.
بيىل قازاقتىڭ قايسار قىزىنىڭ تۋعانىنا 100 جىل تولدى.
سونداي-اق مەملەكەت باسشىسى اقتوبە وبلىسىنا ساپارى بارىسىندا ءاليا مولداعۇلوۆانىڭ ەسكەرتكىشى جانىندا جەرگىلىكتى جۇرتشىلىقپەن كەزدەستى.
- ءاليا مولداعۇلوۆا - حالقىمىزدىڭ قايسار قىزى. بۇگىن 100 جىلدىعىنا وراي ارنايى كەلدىم. بۇل، ەڭ الدىمەن، ازاماتتىق بورىشىم. تاعزىم ەتۋ ءۇشىن كەلىپ وتىرمىن. بارشاڭىزعا كوپ راقمەت. ءاليانىڭ ەسىمىن حالقىمىزدىڭ اراسىندا، شەتەلدە كەڭ اۋقىمدا دارىپتەۋىمىز كەرەك. ول - ءبىزدىڭ ماقتانىشىمىز. سوندىقتان ونىڭ ەسىمى ءبىزدىڭ جادىمىزدا ماڭگى ساقتالادى، - دەدى قاسىم-جومارت توقايەۆ.
سونداي-اق پرەزيدەنت قازىرگى الماعايىپ زاماندا بىرلىكتى، تاتۋلىقتى ساقتاۋ وتە ماڭىزدى ەكەنىنە نازار اۋداردى.
وسىعان دەيىن پرەزيدەنتتىڭ اقتوبە وبلىسىنا بارعانى تۋرالى جازدىق.