پرەزيدەنت ب ا ءا قورعانىس ىستەرى جونىندەگى مەملەكەتتىك ءمينيسترى مۇحاممەد بەن مۋباراك فادەل ءال-ءمازرۋيدى قابىلدادى
استانا. KAZINFORM - مەملەكەت باسشىسى ب ا ءا قورعانىس ىستەرى جونىندەگى مەملەكەتتىك ءمينيسترى مۇحاممەد بەن مۋباراك فادەل ءال-ءمازرۋيدى قابىلدادى، دەپ حابارلايدى اقوردانىڭ باسپا ءسوز قىزمەتى.
كەزدەسۋدە ەكى ەلدىڭ قاۋىپسىزدىك جانە اسكەري ءبىلىم بەرۋ سالالارىنداعى ىنتىماقتاستىق پەرسپەكتيۆاسى تالقىلاندى.
مەملەكەت باسشىسى امىرلىكتەردىڭ قورعانىس ونەركاسىبىندەگى جەتىستىكتەرىنە توقتالدى، سونداي-اق وزىق تەحنولوگيا مەن يننوۆاتسيا باعىتىنداعى تاجىريبە الماسۋ مۇمكىندىكتەرىنە نازار اۋداردى.
پرەزيدەنت قازاقستان مەن بىرىككەن اراب امىرلىكتەرىنىڭ قارىم-قاتىناسى قارقىندى دامىپ كەلە جاتقانىن اتاپ ءوتىپ، ەكىجاقتى ستراتەگيالىق سەرىكتەستىكتى ودان ءارى نىعايتۋعا دايىن ەكەنىن ايتتى.
قورعانىس ءمينيسترى مەملەكەت باسشىسىنا ب ا ءا پرەزيدەنتى مۇحامەد بەن زايد ءال ناحاياننىڭ جانە پرەمەر-مينيستر، دۋباي ءامىرشىسى مۇحاممەد بەن راشيد ءال ماكتۋمنىڭ ىزگى سالەمىن جەتكىزدى.
سونداي-اق بۇل ساپار اسكەري سالاداعى ءوزارا ىقپالداستىقتى نىعايتۋعا تىڭ سەرپىن بەرەتىنىنە سەنىم ءبىلدىردى.
وسىعان دەيىن مەملەكەت باسشىسىنىڭ يتاليا پرەزيدەنتى سەردجو ماتتارەللانى ەلوردا اۋەجايىنان شىعارىپ سالعانى تۋرالى جازدىق.