پرەزيدەنت اسكەري قىزمەتشىلەرگە مەملەكەتتىك ناگرادالار تاپسىردى
استانا. KAZINFORM - قاسىم-جومارت توقايەۆ مەملەكەتتىك ناگرادالار، جوعارى اسكەري جانە ارناۋلى اتاقتار، سىنىپتىق شەندەر تاپسىرۋ راسىمىنە قاتىستى. بۇل تۋرالى اقوردا ءمالىم ەتتى.
مەملەكەت باسشىسى - قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆ سالتاناتتى جيىندا ساردارلار مەن ساربازداردى الداعى وتان قورعاۋشى كۇنىمەن قۇتتىقتادى. سونىمەن قاتار پاتريوتيزم مەن جاۋىنگەرلىك رۋحتىڭ سيمۆولىنا اينالعان مەرەكە كۇندەرى ەلگە قورعان بولىپ جۇرگەن ازاماتتارعا قۇرمەت كورسەتۋ، وتان ءۇشىن وت كەشكەن اعا بۋىننىڭ رۋحىنا تاعزىم ەتۋ، ولاردىڭ جانقيارلىعى مەن وشپەس ەرلىگىن ۇرپاقتىڭ جادىندا جاڭعىرتۋ داستۇرگە اينالعانىن اتاپ ءوتتى.
- قازاق - بولمىسىنان جاۋجۇرەك حالىق. باتىر بابالارىمىز كەڭ- بايتاق جەرىمىزدى اق بىلەكتىڭ كۇشىمەن، اق نايزانىڭ ۇشىمەن قورعادى. «ەر - ەلدىڭ ايناسى» دەيدى. شىن مانىندە، حالقىمىزدىڭ ەرلىك ءداستۇرى اتادان بالاعا جالعاسىپ كەلەدى. قازاق ساربازى قاي كەزدە دە ەلىن قورعاي بىلگەن. جەرىنىڭ شەتىنە جاۋ تيسە، جۇدىرىقتاي جۇمىلىپ ءبىر تۋدىڭ استىنان تابىلعان. بيىل ۇلى جەڭىسكە 80 جىل تولىپ وتىر. ادامزات تاريحىنداعى وسىنداي سۇراپىل سوعىس بارشا ەلدەر ءۇشىن ۇلكەن سىناق بولعانى ءسوزسىز. مايدانعا ءبىر ميلليون ەكى ءجۇز مىڭنان استام ازاماتىمىز اتتاندى. ولاردىڭ جارتىسى ۇرىس دالاسىنان ورالعان جوق. تىل ەڭبەككەرلەرى كۇن-ءتۇن دەمەي تەر توكتى. وسىلايشا، حالقىمىز ۇلى جەڭىسكە ولشەۋسىز ۇلەس قوستى. جەڭىس مەرەكەسى ەرەن ەرلىكتى پاش ەتەدى. سونداي-اق بەيبىت ءومىردىڭ، بىرلىك پەن ىنتىماقتىڭ ماڭىزىن ۇعىندىرادى. جەڭىس كۇنى ارقىلى ۇرپاققا بەرىلەتىن ەڭ باستى تاعىلىم - وسى، - دەدى قاسىم-جومارت توقايەۆ.
قاسىم-جومارت توقايەۆ قازاقستاننىڭ كۇشتىك قۇرىلىمدارىن ءباھادۇر بابالاردىڭ لايىقتى ءىزباسارى دەپ اتادى.
- قارۋلى كۇشتەر ەلىمىزدىڭ تاۋەلسىزدىگىن، تىنىشتىعى مەن تۇتاستىعىن قاس قاقپاي كۇزەتىپ تۇر. قۇقىق قورعاۋ ورگاندارى زاڭ مەن ءتارتىپتى، ارناۋلى قىزمەتتەر ۇلتتىق قاۋىپسىزدىكتى قامتاماسىز ەتىپ كەلەدى. قۇتقارۋشىلار ەل-جۇرتتىڭ اماندىعى ءۇشىن ايانباي ەڭبەك ەتىپ ءجۇر. بىلتىر ءبىز بىرىككەن ۇلتتار ۇيىمىنىڭ بىتىمگەرلىك ميسسياسىن العاش رەت دەربەس ورىنداۋعا كىرىستىك. بۇل قادام حالىقارالىق قاۋىمداستىقتىڭ قازاقستان ارمياسىنا سەنىمى جوعارى ەكەنىن كورسەتەدى. ءبىز - بەيبىت مەملەكەتپىز. بارلىق ەلمەن دوستىق قاتىناس ورناتتىق. داۋلى ماسەلەنىڭ ءبارىن ساياسي ديالوگ ارقىلى شەشۋ كەرەك دەپ سانايمىز. مەن بۇل قازاقستاننىڭ مىزعىماس ۇستانىمى ەكەنىن ۇنەمى ايتىپ ءجۇرمىن. دەگەنمەن قامسىز وتىرۋعا بولمايدى. ارميامىز كەز كەلگەن ساتتە ءوز مىندەتىن ورىنداۋعا ساقاداي ساي تۇرۋعا ءتيىس، - دەدى مەملەكەت باسشىسى.
پرەزيدەنتتىڭ ايتۋىنشا، مەملەكەت قارۋلى كۇشتەردىڭ الەۋەتىن نىعايتۋعا ايرىقشا ءمان بەرىپ وتىر.
- اسكەرىمىز ەڭ وزىق قارۋمەن جانە تەحنيكامەن جاراقتاندىرىلىپ جاتىر. قورعانىس ونەركاسىبى كەشەنى دامىپ كەلەدى. جاڭا گارنيزوندار، اسكەري قالاشىقتار مەن زاستاۆالار سالىنۋدا. ساربازداردىڭ ازىرلىگى مەن جاۋىنگەرلىك ماشىعى ءاردايىم شىڭدالادى. اسكەرىمىزدىڭ ارناۋلى حالىقارالىق جارىستاردان جۇلدەمەن ورالۋى - ولاردىڭ دايىندىعى جوعارى ەكەنىنە دالەل. اسكەريلەر، ارناۋلى جانە قۇقىق قورعاۋ، ازاماتتىق قورعانىس ورگاندارىنىڭ قىزمەتكەرلەرى الەۋمەتتىك تۇرعىدان جان-جاقتى قامتىلعان. ولاردى مەملەكەت ءارقاشان قولدايدى. ەل قاۋىپسىزدىگى مەن شەكاراسىن قاس قاقپاي كۇزەتۋ، زاڭ مەن ءتارتىپ ۇستەمدىگىن قامتاماسىز ەتۋ - جاۋاپتى ءارى قاستەرلى مىندەت. مۇنى تەك كاسىبي دەڭگەيى جوعارى، انت پەن بورىشقا ادال، ەل ءۇشىن ايانىپ قالمايتىن باتىل جاندار عانا اتقارا الادى. سوندىقتان اسكەريلەر، قۇتقارۋشىلار مەن كۇشتىك قۇرىلىم قىزمەتكەرلەرى وسكەلەڭ ۇرپاق پەن بارشا حالقىمىز ءۇشىن وتانعا ادال قىزمەت ەتۋدىڭ ۇلگىسى بولۋعا ءتيىس، - دەدى قاسىم-جومارت توقايەۆ.
ەسكە سالا كەتەيىك، بۇعان دەيىن پرەزيدەنتتىڭ باق سالاسىنداعى ماراپاتتارىنا ءوتىنىم قابىلداۋ باستالعانىن جازعان بولاتىنبىز.