پرەزيدەنت Amazon كومپانياسىنىڭ اعا ۆيتسە-پرەزيدەنتى دەۆيد زاپولسكيدى قابىلدادى
نيۋ-يورك. KAZINFORM - قاسىم-جومارت توقايەۆ پەن Amazon كومپانياسىنىڭ اعا ۆيتسە-پرەزيدەنتى، جاھاندىق جانە قۇقىقتىق ماسەلەلەر جونىندەگى باس ديرەكتورى دەۆيد زاپولسكي سيفرلاندىرۋ، بايلانىس جانە جاساندى ينتەللەكت سالالارىنداعى ىنتىماقتاستىقتىڭ جاي-جاپسارىن تالقىلادى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنت Amazon كومپانياسىنىڭ ەلىمىزدىڭ جاساندى ينتەللەكت جانە سيفرلىق دامۋ مينيسترلىگىمەن، سونداي-اق «قازاق تەلەكوم» كومپانياسىمەن بىرلەسكەن جوبالاردى جۇزەگە اسىرۋ جوسپارىنا قولداۋ ءبىلدىردى.
ىنتىماقتاستىق قازاقستان اۋماعىنداعى جىلدامدىعى جوعارى ينتەرنەتتى قامتاماسىز ەتۋ جانە كيبەرقاۋىپسىزدىكتى نىعايتۋ سەكىلدى ستراتەگيالىق ماڭىزدى باعىتتاردى قامتيدى.
Amazon تەك ەلىمىزگە قاتىستى جوبالاردى جۇزەگە اسىرۋمەن شەكتەلمەي، قازاقستاندى سپۋتنيكتىك بايلانىستىڭ وڭىرلىك حابىن قالىپتاستىرۋعا بولاتىن الاڭ رەتىندە قاراستىرىپ وتىر.
قازاقستان پرەزيدەنتىنىڭ نيۋ-يورككە جۇمىس ساپارى اياسىندا «قازاق تەلەكوم» جانە Amazon Kuiper كومپانيالارى Kuiper سپۋتنيك جەلىسىنىڭ قىزمەت كورسەتۋىنە قاتىستى ديستريبيۋتورلىق كەلىسىمگە قول قويدى.
سوعان ساي Amazon Kuiper كومپانياسى الماتى، اقكول جانە اقتاۋ قالالارىندا ءوزىنىڭ جەردەگى ينفراقۇرىلىمىن جاساقتاۋدى كوزدەيدى. بۇل جوباعا 200 ميلليون دوللارعا جۋىق ينۆەستيتسيا سالۋ جوسپارلانعان.
اتالعان باستاما مەملەكەت باسشىسىنىڭ سيفرلىق ينفراقۇرىلىمدى دامىتۋ جانە ەلىمىزدىڭ بارلىق ءوڭىرى ءۇشىن زاماناۋي تەلەكوممۋنيكاتسيا قىزمەتىنە تەڭدەي قول جەتكىزۋ تاپسىرماسىن ورىنداۋ اياسىندا ىسكە اسىرىلادى.
ايتا كەتەلىك پرەزيدەنت PepsiCo قورى ديرەكتورلار كەڭەسىنىڭ ءتوراعاسى ستيۆەن كيحونى قابىلداعان ەدى.