پرەزيدەنت الماتى وبلىسىنىڭ اكىمى مارات سۇلتانعازيەۆتى قابىلدادى

استانا. KAZINFORM - مارات سۇلتانعازيەۆ وبلىستىڭ بيىلعى قاڭتار-مامىر ايلارىنداعى نەگىزگى الەۋمەتتىك-ەكونوميكالىق دامۋ كورسەتكىشتەرى تۋرالى باياندادى.

جالپى وڭىرلىك ءونىم كولەمى 5 تريلليون تەڭگەگە جەتكەن وبلىس ەلىمىز بويىنشا بەسىنشى ورىندا تۇر.

قاڭتار-مامىر ايلارىنداعى قىسقا مەرزىمدىك ەكونوميكالىق كورسەتكىش 107,9 پايىزدى قۇراعان.

ونەركاسىپتىڭ جالپى كولەمى جونىنەن وڭدەۋ ونەركاسىبى �,5 جەتەكشى ورىنعا يە.

اۋىل شارۋاشىلىعى، بايلانىس قىزمەتى، كولىك، قۇرىلىس سالالارىندا جانە ساۋدا- ساتتىق سەكتورىندا دا ايتارلىقتاي ءوسىم قارقىنى بايقالاتىنىن ايتتى.

وبلىس اۋماعىندا 7 يندۋستريالىق ايماق قۇرىلىپ جاتقانى جونىندە باياندالدى. ءوڭىردىڭ 2030 -جىلعا دەيىنگى ينۆەستيتسيالىق پورتفەلىنە جالپى قۇنى 3,7 تريلليون تەڭگە بولاتىن 207 جوبا ەنگەن.

بيىل سوماسى 446,7 ميلليارد تەڭگە بولاتىن 58 جوبا جۇزەگە اسىرىلىپ، 5,3 مىڭ جاڭا جۇمىس ورنى اشىلماق.

شاعىن جانە ورتا بيزنەستىڭ دامۋى جونىندە مالىمەت بەردى.

2024 -جىلدىڭ باسىنداعى دەرەككە سايكەس وڭىردە 136,7 مىڭ شاعىن جانە ورتا بيزنەس سۋبەكتىسى جۇمىس ىستەيدى. بۇل بىلتىرعى كورسەتكىشتەن 6,3 پايىزعا كوپ.

«اۋىل اماناتى» باعدارلاماسى اياسىندا 53 اۋىل شارۋاشىلىعى كووپەراتيۆى قۇرىلعان. ونىڭ 46 سىنا ءتيىستى قارجىلاي قولداۋ كورسەتىلگەن.

وڭىردەگى الەۋمەتتىك ماسەلەلەر، سونىڭ ىشىندە ءۇش اۋىسىمدى مەكتەپتەردىڭ پروبلەماسى جوسپارلى تۇردە شەشىلىپ جاتقانىن ايتتى.

بىلتىر 13,8 مىڭ ورىندىق 13 مەكتەپتىڭ قۇرىلىسى اياقتالعان.

2024-2025 -جىلدارى «جايلى مەكتەپ» ۇلتتىق جوباسى اياسىندا تاعى دا 53 مەكتەپ سالۋ جوسپارلانىپ وتىر.

الماتى وبلىسىندا جۇرگىزىلگەن «تازا قازاقستان» ەكولوگيالىق اكتسياسىنىڭ العاشقى بەس اپتاسىنىڭ قورىتىندىسى تانىستىرىلدى.

وبلىس تۇرعىندارى قوعامدىق ورىنداردى اباتتاندىرۋ جانە جاپپاي اعاش وتىرعىزۋ ىسىنە بەلسەندى اتسالىسقان. اتالعان شارا اياسىندا 19506 توننا قوقىس جينالىپ، 6600 گەكتاردان استام اۋماق تازارتىلعان.

مەملەكەت باسشىسى «تازا قازاقستان» باستاماسى ەكولوگيالىق مادەنيەتتى قالىپتاستىراتىن ماڭىزدى قادام ەكەنىن اتاپ ءوتىپ، وبلىس اكىمىنە اتالعان جۇمىستى تۇراقتى تۇردە جۇرگىزۋدى تاپسىردى.

كەزدەسۋ بارىسىندا وبلىس ورتالىعى قونايەۆتى، جاڭادان قۇرىلعان الاتاۋ قالاسىن جانە تۇتاس اگلومەراتسيانى دامىتۋ پەرسپەكتيۆاسى تالقىلاندى. مەملەكەت باسشىسىنا قالا قۇرىلىسىنا قاتىستى قۇجاتتامانى ازىرلەۋ جانە بەكىتۋ جۇمىستارىنىڭ ارالىق ناتيجەسى تانىستىرىلدى.

قاسىم-جومارت توقايەۆ وبلىستىڭ ستراتەگيالىق دامۋ جوسپارىن ورىنداۋعا باعىتتالعان جۇمىستاردى جالعاستىرۋدى، سونداي- اق Alatau City جوباسىن جۇزەگە اسىرۋ ءۇشىن الەۋەتتى ينۆەستورلارمەن قارىم-قاتىناستى جانداندىرۋدى تاپسىردى.