پرەزيدەنت اكتيۆتەردى قايتارۋ تۋرالى: قۇقىق قورعاۋ ورگاندارى جۇگەنسىزدىككە جول بەرمەۋگە ءتيىس

استانا. KAZINFORM - ەلدەن زاڭسىز شىعارىلعان اكتيۆتەردى قايتارۋ ينۆەستيتسيانىڭ تاعى ءبىر قاينار كوزى بولۋعا ءتيىس. بۇل تۋرالى پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ايتتى.

«ەلدەن زاڭسىز شىعارىلعان اكتيۆتەردى قايتارۋ ينۆەستيتسيانىڭ تاعى ءبىر قاينار كوزى بولۋعا ءتيىس. مەن بۇل شارۋانىڭ باعىت-باعدارى تۋرالى بىرنەشە رەت ايتقان بولاتىنمىن. بيزنەس وكىلدەرىمەن كەزدەسۋلەردە دە وسى ماسەلەگە توقتالدىم. ۋاكىلەتتى قۇرىلىمدار جۇمىستى جانداندىرۋى كەرەك. تۇسكەن قاراجاتتى ەلىمىز ءۇشىن ماڭىزى زور جوبالاردى جۇزەگە اسىرۋعا پايدالانۋ قاجەت»، - دەدى مەملەكەت باسشىسى.

الايدا، پرەزيدەنت قۇقىق قورعاۋ ورگاندارى دا جۇگەنسىزدىككە جول بەرمەۋگە ءتيىس ەكەنىن دە ەسكە سالدى.

«تاعى دا ەسكەرتەمىن، «شاش ال دەسە، باس الىپ»، اسىرا سىلتەمەۋ كەرەك. مەن مۇنداي ءجونسىز ارەكەتتىڭ قاي-قايسىسىن دا قاتاڭ ايىپتايمىن. ءبىزدىڭ باستى مىندەتىمىز - كاسىپكەرلەردىڭ ەركىندىگىن شەكتەۋ ەمەس، كەرىسىنشە، ەلىمىزدە بيزنەسكە جانە ينۆەستيتسياعا جايلى ورتا قالىپتاستىرۋ. بۇل جۇمىستىڭ الەۋمەتتىك ادىلدىكتى قامتاماسىز ەتۋ تۇرعىسىنان ايرىقشا ءمانى بار. ماڭىزدى ەكونوميكالىق مىندەتتى ورىنداۋدى كوزدەيتىن وسى باستامانى ەشكىمنىڭ جوققا شىعارۋىنا جول بەرىلمەيدى»، - دەدى قاسىم- جومارت توقايەۆ.

مەملەكەتتىك ساتىپ الۋ جانە مەملەكەتتىك قولداۋ شارالارىن ۇسىنۋ كەزىندە ورتا بيزنەسكە باسىمدىق بەرىلۋى كەرەك.

«ميكرو جانە شاعىن كاسىپكەرلىك ءۇشىن ەڭبەكاقى تولەۋ قورىنان ءبىر رەتتىك تولەم جاساۋدى ەنگىزۋ ءىسى دە اياقسىز قالدى. بۇل نورمانىڭ ەنگىزىلگەنىنە ءبىر جىلدان استى. ۋاكىلەتتى ورگاندار جۇمىستىڭ تابىستى اتقارىلعانى تۋرالى ەسەپ بەردى. ال بيزنەس وكىلدەرى بۇرىنعىسىنشا سالىق پەن جارنانى بيۋدجەتتىك ەمەس قورلارعا جەكە-جەكە تولەۋدى جالعاستىرىپ جاتىر. ءبىر جاعىنان، ورتا بيزنەسكە ناقتى قولداۋ كورسەتۋ ماسەلەسىنە ايرىقشا ءمان بەرۋ كەرەك. مىسالى، كوپ جاعدايدا بيزنەستى قولدان ۇساقتاپ جاتادى»، - دەدى قاسىم- جومارت توقايەۆ.

پرەزيدەنتتىڭ ايتۋىنشا، كاسىپكەرلەردى ءتيىستى ساناتقا ءبولۋ ادىستەمەسى دۇرىس جولعا قويىلماعان.

«مەملەكەتتىك ساتىپ الۋ جانە مەملەكەتتىك قولداۋ شارالارىن ۇسىنۋ كەزىندە ورتا بيزنەسكە باسىمدىق بەرىلۋى كەرەك. وسى ماسەلەلەردى مىندەتتى تۇردە شەشۋ قاجەت. بيزنەسكە اكىمشىلىك قىسىم كورسەتۋدى ازايتۋ كەرەك، سونىڭ ىشىندە رەتتەۋ قاعيداتىن قولدانۋ ارقىلى ىقپال ەتۋدى دوعارعان ءجون. توقەتەرىن ايتساق، وسى سالاعا ساپالى وزگەرىس جاساۋ كەرەك»، - دەدى مەملەكەت باسشىسى.

اۆتور

رۋسلان عابباسوۆ