پرەزيدەنت ا ە س قۇرىلىسى تۋرالى: الەمدىك پروگرەستەن شەت قالماۋىمىز كەرەك

استانا. KAZINFORM - مەملەكەت باسشىسى قاسىم-جومارت توقايەۆ ەلوردادا ءماسليحات دەپۋتاتتارىنىڭ Ⅱ رەسپۋبليكالىق فورۋمىندا ا ە س قۇرىلىسى تۋرالى جالپىۇلتتىق رەفەرەندۋم جونىندە پىكىر ءبىلدىردى.

«بىرنەشە كۇننەن كەيىن وتەتىن جالپى ۇلتتىق رەفەرەندۋمدا حالقىمىز قازاقستاندا اتوم ەلەكتر ستانتسياسىن سالۋ قاجەت پە، الدە قاجەت ەمەس پە دەگەن ماسەلەنى شەشەدى. داۋىس بەرۋ ناتيجەسى قانداي بولسا دا، بۇل - ايتۋلى ۋاقيعا. الداعى رەفەرەندۋم - قازاقستاندا سوڭعى بەس جىلدا بولعان اۋقىمدى وزگەرىستەردىڭ تاعى ءبىر مىسالى، «حالىق ۇنىنە قۇلاق اساتىن مەملەكەت» تۇجىرىمداماسىنىڭ جارقىن كورىنىسى. ا ە س قۇرىلىسىنا قاتىستى ءوز ۇستانىمىمدى بۇعان دەيىن بىرنەشە رەت ايتتىم. الەمدەگى پروگرەستەن شەت قالماۋ ءۇشىن ءبىز باسەكەلەستىكتە ءوز ارتىقشىلىقتارىمىزدى پايدالانۋىمىز كەرەك. ازاماتتار قولداپ داۋىس بەرگەن جاعدايدا، بۇل تاۋەلسىز قازاقستاننىڭ بۇكىل تاريحىنداعى ەڭ ءىرى جوباعا اينالادى»، - دەدى ق. توقايەۆ فورۋمدا سويلەگەن سوزىندە.

پرەزيدەنت اتوم ەلەكتر ستانتسياسىن سالۋ - ۇزاقمەرزىمدى جوبا ەكەنىن اتاپ ءوتتى.

«الايدا بۇل باستاما ەلىمىزدىڭ ورنىقتى دامۋىن ونجىلدىقتارعا ىلگەرىلەتەدى، ەنەرگەتيكالىق دەربەستىگىمىزدى نىعايتادى، ەكونوميكانىڭ، عىلىم مەن ءبىلىمنىڭ ءتۇرلى سالاسىن وركەندەتۋگە تىڭ سەرپىن بەرەدى، سونداي- اق ينجەنەرلەر شوعىرى مەن ءارتۇرلى بەيىندەگى ماماندار لەگىن قالىپتاستىرۋعا ىقپال ەتەدى. زاماننىڭ تالابى وسى. دەمەك، ونىڭ پايداسىن قازىرگى جاستارىمىز بەن بولاشاق ۇرپاق كورەدى. وسى رەتتە ا ە س قۇرىلىسىنا قولداۋ ءبىلدىرىپ جاتقان حالىقتىق شتابتىڭ جۇمىسىن ەرەكشە اتاپ وتكىم كەلەدى. شتاب ساياسي پارتيالار مەن ءتۇرلى قوعامدىق ۇيىمداردىڭ وكىلدەرىن، عالىمداردى، ساراپشىلاردى، ءوندىرىس ماماندارى مەن كاسىپكەرلەردى بىرىكتىردى. ازاماتتاردىڭ ۇيىسىپ، ورتاق ىسكە جۇمىلا كىرىسە الاتىنىن كورسەتەدى. دامۋعا ۇمتىلىس - ۇلتىمىزدىڭ ەڭ جاقسى قاسيەتتەرىنىڭ ءبىرى. سوندىقتان ءبىز ەشقانداي قيىندىققا قاراماستان، العا قاراي باتىل قادام باسۋىمىز كەرەك. تاعى دا قايتالايمىن. الداعى رەفەرەندۋم تاۋەلسىزدىك جىلدارىنداعى ەڭ ماڭىزدى ۋاقيعا بولادى جانە ەلىمىزدىڭ ودان ءارى دامۋىنا تىكەلەي اسەر ەتەدى»، - دەدى مەملەكەت باسشىسى.

ايتا كەتەيىك، ەلوردادا AMANAT پارتياسىنىڭ ءماسليحات دەپۋتاتتارىنىڭ فورۋمى باستالدى. شاراعا مەملەكەت باسشىسى قاسىم- جومارت توقايەۆ قاتىسىپ جاتىر.