پرەزيدەنت ا ق ش- تىڭ ورتالىق ازياداعى يادرولىق قارۋدان ازات ايماق تۋرالى حاتتامانى راتيفيكاتسيالاۋى ماڭىزدى ەكەنىن ايتتى
ورتالىق ازياداعى يادرولىق قارۋدان ازات ايماق تۋرالى شارتقا تەرىس كەپىلدىكتەر تۋرالى حاتتامانى راتيفيكاتسيالاۋ ماڭىزدى. مۇنى «ورتالىق ازيا – ا ق ش» مەملەكەت باسشىلارىنىڭ سامميتىنە قاتىسقان پرەزيدەنت قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى اقورداعا سىلتەمە جاساپ.
مەملەكەت باسشىسى اتاپ وتكەندەي، بۇل قادام ءوڭىردىڭ يادرولىق قارۋدان ادا مارتەبەسىن ينستيتۋتسيونالداندىرۋ پروتسەسىن اياقتاۋعا مۇمكىندىك بەرەدى، سونداي- اق يادرولىق قارۋسىزدانۋ جانە جاپپاي قىرىپ- جوياتىن قارۋدى تاراتپاۋ رەجيمىن نىعايتۋ جونىندەگى حالىقارالىق كۇش- جىگەردىڭ ماڭىزدى كەزەڭىنە اينالادى.
بۇعان دەيىن اتالعان حاتتامانى قىتاي، رەسەي، فرانسيا جانە ۇلى بريتانيا ەلدەرى راتيفيكاتسيالاعان.
ايتا كەتەيىك، ورتالىق ازيا - سولتۇستىك جارتى شارداعى يادرولىق ارسەنالداردى ورنالاستىرۋعا تىيىم سالىنعان جالعىز ايماق.
مۇنداي ايماقتار لاتىن امەريكاسىندا، افريكادا، وڭتۇستىك- شىعىس ازيادا جانە تىنىق مۇحيتىنىڭ وڭتۇستىك بولىگىندە قۇرىلعان.
سونىمەن بىرگە پرەزيدەنت بىرىككەن ۇلتتار ۇيىمى باس اسسامبلەياسىنىڭ 78-سەسسياسىندا سويلەگەن سوزىندە دە يادرولىق قاۋىپتەن ادا ايماق قۇرۋ باستاماسىن كوتەردى.
«يادرولىق دەرجاۆالار اراسىندا يادرولىق قارۋدان ادا الەم قۇرۋ جولىندا ءوزارا سەنىم مەن ىنتىماقتاستىق بولعاندا عانا جاھاندىق تۇراقتىلىقتى قامتاماسىز ەتە الامىز. وسىعان بايلانىستى قازاقستان يادرولىق قارۋعا تىيىم سالۋ تۋرالى شارتتى قاتاڭ ساقتايتىنىن مالىمدەيدى. ءبىز قارۋسىزدانۋ جانە قارۋدى تاراتپاۋ سالاسى بويىنشا جاڭا تەتىكتەردى دامىتۋدى قولدايمىز. 2045 -جىلعا دەيىن يادرولىق قارۋدان تولىق باس تارتۋدىڭ ستراتەگيالىق جوسپارى قازىرگى كوشباسشىلاردىڭ جاھاندىق قاۋىپسىزدىكتى قامتاماسىز ەتۋگە قوسقان ەڭ ماڭىزدى ۇلەسى بولۋى مۇمكىن»، - دەگەن ەدى پرەزيدەنت ب ۇ ۇ سەسسيانىڭ جالپى دەباتىندا سويلەگەن سوزىندە.