پرەزيدەنت: 2025-جىلعا دەيىن بۇكىل وبلىس ورتالىقتارى 5G ينتەرنەتپەن قامتىلۋعا ءتيىس
ۇلتتىق ستاتيستيكا بيۋروسىن ناعىز سيفرلىق ۆەدومستۆوعا اينالدىراتىن ماڭىزدى رەفورمانى جۇزەگە اسىرۋ كەرەك. بۇل تۋرالى Digital Bridge 2023 حالىقارالىق تەحنولوگيالىق فورۋمىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى Kazinform.
«ۇلتتىق ستاتيستيكا بيۋروسىن ناعىز سيفرلىق ۆەدومستۆوعا اينالدىراتىن ماڭىزدى رەفورمانى جۇزەگە اسىرۋ كەرەك. ستاتيستيكالىق جانە باسقا دا دەرەكتەردى رەتكە كەلتىرۋ ءۇشىن كەشەندى شارالار قابىلداۋ قاجەت. ونىڭ ىشىندە باسقارۋ ساياساتىن ازىرلەۋ، دەرەكتەردىڭ ماقساتتى ارحيتەكتۋراسىن انىقتاۋ ماسەلەسىن نازاردان تىس قالدىرماعان ءجون. بۇل مەملەكەتتىڭ ءتيىمدى شەشىمدەر قابىلداۋىنىڭ نەگىزگى شارتى بولادى. 5G جەلىسىن كەڭ كولەمدە ەنگىزۋ يننوۆاتسيانىڭ دامۋىنا تىڭ سەرپىن بەرەدى. بۇل پروتسەسس قازاقستاندا ءقازىردىڭ وزىندە ءجۇرىپ جاتىر»، - دەدى مەملەكەت باسشىسى.
پرەزيدەنت 2027 -جىلعا دەيىن بارلىق وبلىس ورتالىقتارىن ۇيالى بايلانىستىڭ جاڭا بۋىنىمەن قامتۋ مىندەتى بۇعان دەيىن جۇكتەلگەنىن ەسكە سالدى.
«الايدا تەحنولوگيانىڭ قارىشتاپ دامۋ جاعدايىندا ءبىز دە قارقىندى ارتتىرۋىمىز كەرەك. ۇكىمەت بۇل جۇمىستى مەرزىمىنەن بۇرىن، ياعني 2025 -جىلدىڭ سوڭىنا دەيىن اياقتاۋى قاجەت. ارينە، مەرزىمنىڭ وزگەرۋى كورسەتىلەتىن قىزمەتتەردىڭ ساپاسىنا اسەر ەتپەۋگە ءتيىس. بۇدان بولەك، بۇل ماقساتقا جەتۋ ءۇشىن تومەنگى وربيتاداعى سپۋتنيكتىك جۇيەلەردىڭ مۇمكىندىكتەرىن پايدالانا وتىرىپ، شالعاي اۋدان تۇرعىندارىن ينتەرنەتپەن قامتاماسىز ەتۋ ماڭىزدى. ۇكىمەت بۇل ماسەلەنى جان-جاقتى پىسىقتاۋى كەرەك. قاجەت بولعان جاعدايدا زاڭناماعا وزگەرىستەر ەنگىزۋگە بولادى»، - دەدى قاسىم-جومارت توقايەۆ.