گرۋزيادا پوليتسيا پارلامەنت عيماراتىنىڭ ماڭىندا نارازىلىق بىلدىرۋشىلەردى تاراتىپ جاتىر

استانا. KAZINFORM - ارنايى كۇشتەر گرۋزيا پارلامەنتى عيماراتىنىڭ ماڭىندا نارازىلىق بىلدىرۋشىلەردى تاراتىپ جاتىر. قاۋىپسىزدىك كۇشتەرى كوزدەن جاس اعىزاتىن گاز قولداندى، ال شەرۋشىلەر بارريكادالار تۇرعىزدى، دەپ حابارلايدى DW اقپارات اگەنتتىگى.

گرۋزيادا ەلدىڭ ەۋروينتەگراتسيا كۋرسىنا ورالۋىن تالاپ ەتكەن جاپپاي نارازىلىق شەرۋلەرى التىنشى كۇن قاتارىنان جالعاسىپ جاتىر.

سەيسەنبى كۇنى كەشكە ارنايى جاساق پارلامەنت عيماراتى ماڭىنداعى نارازىلىق بىلدىرۋشىلەردى تاراتا باستادى. داۋىس زورايتقىشتاردان تاراۋعا، كۇش قۇرىلىمدارىنىڭ جۇمىسىنا كەدەرگى جاساماۋعا شاقىرۋلار ەستىلەدى.

پوليتسيا كوزدەن جاس اعىزاتىن گاز قولدانىپ، دەمونسترانتتاردى ۇستاۋدا، ال نارازىلىق بىلدىرۋشىلەر بارريكادالار تۇرعىزىپ، وت جاقتى. كەيبىر نارازىلىق بىلدىرۋشىلەر پيروتەحنيكالىق زاتتاردى پايدالانىپ جاتىر.

وسى ارادا گرۋزيانىڭ ءى ءى م مالىمدەۋىنشە، كەيبىر شەرۋشىلەردىڭ ارەكەتى «جينالىستار مەن شەرۋلەر تۋرالى زاڭدا بەلگىلەنگەن شەكتەن اسىپ كەتتى». ىشكى ىستەر ءمينيسترىنىڭ ورىنباسارى الەكساندر داراحۆەليدزەنىڭ ايتۋىنشا، شەرۋلەردە «زاڭسىز ارەكەتتەر جاساعان بىرنەشە اگرەسسيۆتى توپ انىقتالدى».

- جوعارىدا اتالعان زورلىق-زومبىلىق پەن اگرەسسيۆتى ارەكەتتەر ءى ءى م-نىڭ 143 قىزمەتكەرى ءتۇرلى اۋىر جاراقات الدى، - دەدى داراحۆەليدزە.

ونىڭ ايتۋىنشا، بەس ادام قاماۋعا الىنعان. التى كۇن بويى نارازىلىق شەرۋلەرىندە 293 دەمونسترانت اكىمشىلىك قاماۋعا الىندى.

ءوز كەزەگىندە گرۋزين قۇقىق قورعاۋشىلارى قاۋىپسىزدىك كۇشتەرىنىڭ تۇتقىندارعا جاساعان اياۋسىز ارەكەتى تۋرالى حابارلايدى.

وسىعان دەيىن گرۋزياداعى شەرۋلەر كەزىندە 100 دەن اسا ادام قاماۋعا الىنىپ، 10 پوليتسەي جاراقات العانى تۋرالى جازدىق.

تبيليسيدەگى شەرۋدىڭ ءۇشىنشى كۇنىندە 44 ادام جاراقات الدى.

اۆتور
زارينا تۋعانبايەۆا