گرۋزيادا 22-قاراشا ۇلتتىق ازا تۇتۋ كۇنى بولىپ جاريالاندى

گرۋزيادا تبيليسيدىڭ شەتىندەگى كۆەمو-پونيچالا اۋدانىندا گاز جارىلىپ، تۇرعىن ءۇي وپىرىلىپ، ادام ولىمىنە اكەلگەن وقيعاعا بايلانىستى 22-قاراشا ۇلتتىق ازا تۇتۋ كۇنى بولىپ جاريالاندى. بۇل تۋرالى ەل ۇكىمەتىنىڭ اكىمشىلىگى مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى ءبىرىنشى قوعامدىق تەلەارناعا سىلتەمە جاساپ.

فوتو: گرۋزيا ءبىرىنشى قوعامدىق تەلەارناسى

19-قاراشا كۇنى تاڭەرتەڭ تۇرعىن ۇيدە گاز جارىلدى. الدىن الا دەرەك بويىنشا، پاتەرلەردىڭ بىرىندەگى جىلىتقىشتىڭ اقاۋىنان گاز جينالىپ، سوڭى جارىلىسقا ۇلاسقان. جارىلىس كۇشىنەن عيمارات شاتىرىنىڭ ءبىر بولىگى قيراپ، قاباتارالىق جابىندارى وپىرىلدى.

سوڭعى مالىمەتكە سۇيەنسەك، جارىلىس كەزىندە التى ادام، سونىڭ ىشىندە ءبىر بالا قازا تاپقان. تاعى بەس ادام جاراقات الىپ، اۋرۋحاناعا جەتكىزىلگەن. ولاردىڭ ءبىرى - جارىلىس بولعان پاتەردىڭ يەسى. قازىر ونىڭ جاعدايى وتە اۋىر.

ىزدەۋ-قۇتقارۋ وپەراتسياسى شامامەن 15 ساعاتقا سوزىلدى. عيماراتتىڭ قايتا وپىرىلىپ كەتۋ قاۋپى ساقتالعاندىقتان، قۇتقارۋشىلار ۇيىندىلەردى قولمەن اشىپ، ىزدەۋ جۇمىستارىن جۇرگىزگەن. سونىڭ ناتيجەسىندە ءۇش جاسار قىز ءۇيىندى استىنان تىرىدەي قۇتقارىلدى. گرۋزيا ب ا ق-تارىنىڭ حابارلاۋىنشا، ءبۇلدىرشىننىڭ جاعدايى قاناعاتتانارلىق.

تبيليسي مەرياسىنىڭ مالىمەتىنشە، عيماراتتاعى التى كىرەبەرىستىڭ ەكەۋى تۇرۋعا جارامسىز دەپ تانىلعان. ونداعى 28 وتباسى ۋاقىتشا قوناقۇيلەرگە كوشىرىلدى.

سونداي-اق وقيعاعا بايلانىستى گرۋزيا قىلمىستىق كودەكسىنىڭ 240-بابى بويىنشا قىلمىستىق ءىس قوزعالدى. بۇل باپتا قۇرىلىس، تاۋ-كەن جانە وزگە دە جۇمىستار كەزىندە قاۋىپسىزدىك تالاپتارىن بۇزعانى ءۇشىن جاۋاپكەرشىلىك قاراستىرىلعان.