گرۋزيا قازاقستاندىقتارعا ءبىلىم گرانتىن ءبولدى
استانا. KAZINFORM - ق ر حالىقارالىق باعدارلامالار ورتالىعى گرۋزيانىڭ جوعارى وقۋ ورىندارىنا وقۋعا قۇجاتتار قابىلداناتىنىن حابارلادى. ءوتىنىم 26-مامىرعا دەيىن قابىلدانادى.
− ق ر عىلىم جانە جوعارى ءبىلىم مينيسترلىگى مەن گرۋزيانىڭ ءبىلىم، عىلىم جانە جاستار مينيسترلىگى اراسىندا جوعارى جانە ج و و- دان كەيىنگى ءبىلىم مەن عىلىم سالاسىندا ىنتىماقتاستىق كەلىسىمى اياسىندا قازاقستان ازاماتتارىن 2025-2026 وقۋ جىلىنا قابىلداۋ ماقساتىندا باكالاۆريات، ماگيستراتۋرا جانە دوكتورانتۋرا باعدارلاماسى بويىنشا ءبىلىم الۋ مۇمكىندىگى اشىلدى، − دەپ جازدى ورتالىق.
ورتالىقتىڭ حابارلۋىنشا، جالپى سانى 5 گرانت بولىنگەن - 2 باكالاۆر، 2 ماگيستراتۋرا، 1 دوكتورانتۋرا ورىندارى. ماماندىقتار ءتىزىمى ورتالىق سايتىندا كورسەتىلگەن.
ءوتىنىم مەن قۇجاتتاردى 2025 -جىلدىڭ 26 -مامىرىنا دەيىن ەلەكتروندىق ۇكىمەت» پورتالى (Egov.kz) ارقىلى نەمەسە «حالىقارالىق باعدارلامالار ورتالىعى» ا ق- دا قولما- قول تاپسىرۋعا بولادى.
ۇمىتكەرلەردى ىرىكتەۋ ءۇشىن تاۋەلسىز ساراپتامالىق كوميسسيا مۇشەلەرى ونلاين سۇحبات وتكىزەدى، ۇمىتكەرلەردىڭ ماتەريالدارىن قارايدى جانە قورىتىندى كوميسسيا شەشىمى شىعادى.
ۇپاي تەڭ بولعان جاعدايدا جەتىم بالالار مەن اتا-اناسىنىڭ قامقورلىعىنسىز قالعاندار، مۇگەدەكتىگى بار بالالار، كوپ بالالى وتباسىنان شىققان بالالار، اۋىلدىق ەلدى مەكەننەن شىققان، سوڭعى 2 جىلدا اۋىلدىق ەلدى مەكەندە تۇراتىن ۇمىتكەرلەر باسىمدىققا يە بولادى.
ايتا كەتەيىك، بۇگىن قازاقستان گرۋزيا اۋماعىنا كەلگەن ق ر ازاماتتارىن كىرگىزبەۋ فاكتىلەرى جيىلەپ كەتكەنىنە جانە ولاردىڭ كەيىننەن ەلدەن شىعارىلۋ جاعدايلارىنا الاڭداۋشىلىق ءبىلدىردى. بۇل رەتتە قازاقستان ازاماتتارىنىڭ باسىم بولىگى گرۋزياعا تۋريستىك ماقساتتارمەن كەلەتىنى جانە قابىلداۋشى ەلدىڭ زاڭناماسىن بەرىك ساقتايتىنى اتالىپ ءوتتى. ءوز كەزەگىندە گرۋزين تاراپى قازاقستان ازاماتتارىنىڭ گرۋزيا اۋماعىنا كىرۋى مەن بولۋىنا بارىنشا قولايلى جاعداي جاساۋعا دايىن ەكەنىن ءبىلدىردى.