پەريزات قايرات پەن ونىڭ اناسىنىڭ ىسىنە قاتىستى تىڭ دەرەكتەر شىقتى

استانا. KAZINFORM - قارجىلىق مونيتورينگ اگەنتتىگى پەريزات قايراتقا قاتىستى ءىستىڭ ەگجەي-تەگجەيىن جاريالادى.

اگەنتتىك مالىمەتىنشە، 14-ناۋرىزدا پەريزات قايرات پەن عايني الاشبايەۆانىڭ ارەكەتتەرى ساراپتالىپ، ولار الاياقتىقتىڭ اسا ءىرى كولەمدە جاسالۋىنا جانە قىلمىستىق جولمەن الىنعان قاراجاتتى زاڭداستىرۋعا كۇدىكتى دەپ تانىلعان.

«پەريزات قايرات 2021-2024-جىلدار ارالىعىندا بىرنەشە رەت قايىرىمدىلىق كومەك ماقساتىندا حالىقتان اقشا جيناۋعا شاقىرعان. ونىڭ ايتۋىنشا، بۇل قاراجاتتار مۇقتاج بالالارعا، پالەستينا جانە سۋ تاسقىنىنان زارداپ شەككەندەرگە كومەك كورسەتۋ ءۇشىن جۇمسالماق بولعان. جالپى ۇرلانعان قارجى كولەمى - 3,5 ميلليارد تەڭگە»، - دەپ جازىلعان حابارلامادا.

اقشا قايدا اۋدارىلعان؟

مالىمەتكە سۇيەنسەك، پەريزات قايرات Biz Birgemiz Qazaqstan 2030 قورىنا تۇسكەن قاراجاتتى ءوز جەكە جانە اناسى عايني الاشبايەۆانىڭ ەسەپشوتتارىنا اۋدارىپ، كەيىن ولاردى زەرگەرلىك بۇيىمدارعا، كيىم-كەشەككە، جيھازعا، ساياحاتتارعا، جوندەۋ قىزمەتتەرىنە، اۆتوكولىك جالداۋ جانە باسقا دا شىعىندارعا جۇمساعان.

«2024-جىلى 1-ءساۋىر مەن 15-قاراشا ارالىعىندا پەريزات قايرات سۋ تاسقىنىنان زارداپ شەككەندەرگە كومەك كورسەتۋ ماقساتىندا Biz Birgemiz Qazaqstan 2030 ق ق- نىڭ ەسەپشوتىنا 2,8 ميلليارد تەڭگە جيناپ، جىمقىرعانى انىقتالدى. قىلمىستىق تابىستى جىمقىرۋ ماقساتىندا ول 16 سەرىكتەس جەكە كاسىپكەرمەن مەتالدان جاسالعان كيىز ۇيلەر، قايىقتار، ەتىكتەر جانە باسقا دا زاتتاردى جەتكىزۋ جونىندە جالعان كەلىسىمدەر جاساسقان. الايدا بۇل كەلىسىمدەر ءىس جۇزىندە ورىندالماعان»، - دەپ جازىلعان حابارلامادا.

ق م ا مالىمەتىنشە، وسىلايشا ميلليارد تەڭگەدەن اسا قاراجات قولما-قول اقشاعا اينالدىرىلىپ، جەكە ماقساتتارعا جۇمسالعان.

«وسى سومانىڭ 72 ميلليون تەڭگەسى ونىڭ اناسى عايني الاشبايەۆانىڭ ەسەپشوتىنا «سولتۇستىك قازاقستان وبلىسىنداعى زارداپ شەككەن تۇرعىندارعا تۇرمىستىق تەحنيكا ساتىپ الۋ» دەگەن سىلتاۋمەن اۋدارىلىپ، كەيىن ول پەريزات قايرات ارقىلى قولما-قول اقشاعا اينالدىرىلدى»، - دەپ جازىلعان حابارلامادا.

قانداي مۇلىكتەر ساتىپ الىنعان؟

ق م ا دەرەگىنە سۇيەنسەك، بۇل اقشانىڭ ءبىر بولىگى سوماسى 6,9 ميلليون تەڭگە تۇراتىن Rolex ساعاتىن ساتىپ الۋعا جۇمسالعان. پالەستيناعا كومەك كورسەتۋ ءۇشىن جينالعان قاراجاتتىڭ ءبىر بولىگىن 2024-جىلعى قاڭتاردا پەريزات قايرات Rebel flowers ج ش س- ءىن ساتىپ الۋعا جۇمساعان.

«ونىڭ قۇنى 23 ميلليون تەڭگە بولسا دا، كەلىسىمشارتتا كۇدىك تۋعىزباۋ ءۇشىن 2 ميلليون تەڭگەگە تومەندەتىلگەن سومانى كورسەتكەن»، - دەپ جازىلعان حابارلامادا.

گۇل بيزنەسىنەن تۇسكەن تابىسى 69 ميلليون تەڭگە بولعان.

سونىمەن قاتار، ۇرلانعان قاراجاتقا 4 كولىك، 4 پاتەر، 2 اۆتوتۇراق ورنى، ءۇي، جەر تەلىمى جانە عيمارات ساتىپ الىنعان.

سونداي-اق، جالپى قۇنى 158 ميلليون تەڭگە بولاتىن زەرگەرلىك بۇيىمدار، اياق كيىم جانە سومكەلەر تاركىلەندى. جالپى قۇنى 865 ميلليون تەڭگە بولاتىن، قىلمىستىق جولمەن الىنعان مۇلىككە تىيىم سالىندى.

پەريزات قايراتتىڭ اناسى قايدا؟

ق م ا عايني الاشبايەۆاعا قاتىستى ءۇي قاماق تۇرىندەگى بۇلتارتپاۋ شاراسى قابىلدانعانىن مالىمدەدى.

پەريزات قايرات تۋرالى نە بەلگىلى؟

پەريزات قايرات - Biz Birgemiz Qazaqstan قايىرىمدىلىق قورىنىڭ ءتورايىمى، قازاقستانداعى بەلسەندى ەرىكتىلەر قوزعالىسىنىڭ جەتەكشىسى رەتىندە تانىمال. ول سۋ تاسقىنىنان زارداپ شەككەندەرگە كومەك كورسەتۋ، گازا سەكتورىنداعى گۋمانيتارلىق ميسسيالار جانە باسقا دا قايىرىمدىلىق شارالارىمەن اينالىسىپ، قوعامدا بەدەلگە يە بولدى.

2024-جىلى 14-قاراشادا قارجىلىق مونيتورينگ اگەنتتىگى پەريزات قايرات 1,5 ميللياردتى جىمقىردى دەگەن كۇدىككە ىلىنگەنىن حابارلادى.

سونىمەن قاتار ول 2023-جىلعى قاراشادا پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناپ، ونىڭ 200 ميلليونىن قالتاسىنا باسقان دەگەن كۇدىككە ءىلىندى. ق م ا دەرەگىنشە، 2023-جىلعى جەلتوقساندا وسى اقشا ەسەبىنەن پەريزات قايرات Sensata Plaza ەليتالىق كەشەنىنەن 49 ميلليون تەڭگەگە ءۇش بولمەلى پاتەر جانە 30 ميلليون تەڭگەگە Mercedes-Benz EQE 500 4 Matic جاڭا كولىگىن ساتىپ العان.

2024-جىلى 16-قاراشادا استانا قالاسىنىڭ تەرگەۋ سوتى پەريزات قايرات 2 ايعا قاماۋعا الىنعانىن حابارلادى.

2024-جىلى 13-جەلتوقساندا پەريزات قايراتتىڭ ەليتالىق پاتەرلەرى، قىمبات كولىكتەرى بۇعاتتالدى. سونداي-اق پەريزات قايراتتىڭ تۇرعىلىقتى جەرىن ءتىنتۋ بارىسىندا قايىرىمدىلىققا جينالعان قاراجاتقا ساتىپ الىنعان قىمبات تەحنيكا، Cartier ،Graff ،Rolex ،Bulgari، Gucci ،Louis Vuitton ،Versace ،Chopard ،Hermes ،Dolce Gabbana ،Prada جانە ت. ب. سياقتى تانىمال الەمدىك برەندتەردىڭ كيىمدەرى، اياقكيىمى، زەرگەرلىك بۇيىمدارى، سومكەلەرى تاركىلەندى.