پەريزات قايرات ءىسى: كۋاگەرلەر سوتقا كەلمەي جاتىر

استانا. KAZINFORM - استانادا Biz birgemiz قايىرىمدىلىق قورىنىڭ بۇرىنعى جەتەكشىسى، ۆولونتەر پەريزات قايرات پەن ونىڭ اناسى عايني الاشبايەۆاعا قاتىستى سوت وتىرىسىندا كۋاگەرلەردەن جاۋاپ الۋ پروتسەسى جالعاسىپ جاتىر.

بۇگىنگى ەكى جابىرلەنۋشى جانە ءبىر جابىرلەنۋشى تاراپتىڭ وكىلى سوت وتىرىسىنا كەلمەدى.

پروكۋرور ءمادينا ورازالينا جابىرلەنۋشىلەردىڭ تەرگەۋ كەزىندە الىنعان جاۋاپتارىن وقىپ بەردى. ونىڭ ايتۋىنشا، جابىرلەنۋشى جالەلوۆ، بۇحاربايەۆ جانە كۋرمايەۆانىڭ ورنالاسقان جەرىن انىقتاۋ جانە بايلانىس ورناتۋ بويىنشا جەدەل شارا ناتيجە بەرمەگەن. قىزمەتكەرلەر كورسەتىلگەن مەكەنجايعا بارىپ، ۇيالى تەلەفون ارقىلى حابارلاسۋعا جانە جاقىن تۋىستارى ارقىلى بايلانىسۋعا تىرىسقان، ءبىراق، ناتيجە بولماعان.

- وسىعان بايلانىستى قارجىلىق مونيتورينگ اگەنتتىگىنىڭ جەدەل ۋاكىلى راپورت جاسادى، - دەدى پروكۋرور سوت زالىندا.

جاريالانعان جاۋاپقا سايكەس، «Aneko L» ج ش س 3 ميلليون تەڭگە اۋدارعان. بۇل اۋدارىم كەلىسىمشارتتىق مىندەتتەمەسىز جاسالعان. جاۋاپتا كورسەتىلگەندەي، پەريزات قايرات جەتەكشىلىك ەتكەن قور تۋرالى الەۋمەتتىك جەلىلەردە بەلسەندى جارناما جۇرگەندىكتەن، كومپانيا باسشىلىعى قاراجاتتى سۋ تاسقىنىنان زارداپ شەككەن جاندارعا كومەك رەتىندە سول قورعا جىبەرۋدى ۇيعارعان.
تاعى ءبىر جابىرلەنۋشى ماناربەك بۇحاربايەۆ جاۋابىندا 2024 -جىلدىڭ ءساۋىر ايىنىڭ باسىندا الەۋمەتتىك جەلى ارقىلى «Biz Birgemiz Kazakhstan 2030» قورى سۋ تاسقىنىنان زارداپ شەككەندەرگە كومەك جيناپ جاتقانىن بىلگەنىن ايتتى. ول باسقاراتىن ماڭعىستاۋ وبلىسى بويىنشا قازىناشىلىق دەپارتامەنتىنىڭ اتىنان 231500 تەڭگە اۋدارعان. اتالعان سوما دەپارتامەنت قىزمەتكەرلەرىنەن قايىرىمدىلىق ماقساتىندا جينالعان. جاۋاپتا كورسەتىلگەندەي، قاراجاتتىڭ قالاي جۇمسالعانى تۋرالى ەشقانداي ەسەپ الماعان.

پروكۋرور مالىمدەگەندەي، تاعى ءبىر جابىرلەنۋشى ناتاليا كۋرمايەۆا پەريزات قايرات باسقارعان قوردىڭ ەسەپشوتىنا ءوز قالتاسىنان 60 مىڭ تەڭگە اۋدارعان. ول قور وكىلدەرىن تانىماعان، تەك بانك قوسىمشاسىندا قور اتاۋى تۇرعاندىقتان سەنىم ارتقان.

بۇعان دەيىن پەريزات قايرات دايىن ديپلوم ساتىپ العىسى كەلگەن ارەكەتى تۋرالى جازعان ەدىك.

سونداي-اق كۋاگەر پەريزات قايرات قور قارجىسىن قالاي قولما-قول اقشاعا اۋدارعانىن ايتىپ بەردى.

سوت بارىسىندا ايگىلى ءانشى، وتانداسىمىز ديماش قۇدايبەرگەننىڭ ەسىمى اتالدى.

بەلگىلى بولعانداي تاسقىن كەزىندە نازاربايەۆ زياتكەرلىك مەكتەبىنىڭ قىزمەتكەرلەرى 2,9 ميلليون تەڭگە جولداعان.

ءىستى قاراۋ كەزىندە پەريزات قايرات جەتەكشىلىك ەتكەن قورعا قارجى اۋدارعان 47 ادام جابىرلەنۋشى دەپ تانىلدى.