پەريزات قايرات ءىسى: 47 ادام جابىرلەنۋشى دەپ تانىلدى
استانا. KAZINFORM - ەلوردادا ۆولونتەر، قايىرىمدىلىق قورى جەتەكشىسى پەريزات قايرات پەن ونىڭ اناسى عايني الاشبايەۆاعا قاتىستى قىلمىستىق ءىس بويىنشا زارداپ شەككەن جانداردىڭ سانى ايتىلدى.
سوت بارىسىندا مەملەكەتتىك ايىپتاۋشى (پروكۋرور) ارمان كيزيكەن اتالعان ءىس بويىنشا، Biz birgemiz قورىنا قارجى اۋدارعان 47 ادامنىڭ جابىرلەنۋشى دەپ تانىلعانىن ءمالىم ەتتى.
قازىر سوت قىلمىستىق ىسكە قاتىستى دالەلدەردى، ياعني ايىپتاۋ تاراپى سوتتالۋشىنىڭ الەۋمەتتىك جەلىدەگى پاراقشاسىن زەرتتەپ جاتىر.
بۇعان دەيىن كۇدىكتى پەريزات قايرات باسقارعان قايىرىمدىلىق قورىنا نازاربايەۆ مەكتەبىنىنىڭ اتا-انالارى شامامەن 1 ميلليون تەڭگە جيناپ بەرگەنى تۋرالى جازعان بولاتىنبىز.
ودان بولەك پەريزات قايرات جەتەكشىلىك ەتكەن قورعا تاعى ءبىر قۇرىلىس كومپانياسى قورعا 200 ميلليون تەڭگە اۋدارعان.
كەشە وتكەن سوت وتىرىسىندا Forte Bank ماركەتينگ ديرەكتورى انتون كيم تاسقىن كەزىندە پەريزات قايراتتىڭ قورىنا جەكە شوتىمنان جارتى ميلليون تەڭگە اۋدارعانىن ايتقان ەدى.
سوت وتىرىسىندا بەلگىلى بولعانداي پەريزات قايرات اناسىن ورتاعا سالىپ، 23 ميلليون تەڭگەگە گۇل بيزنەسىن ساتىپ العان.
ودان بولەك «اسار- ۇمە» قورىنىڭ پرەزيدەنتى اسحات نۇرماشيەۆ كۇدىكتى پەريزات قايراتقا 200 ميلليون تەڭگە اۋدارعانىن ايتتى.
سونداي-اق تانىمال بلوگەر ولجاس سادىق سوتتا كۋالىك ەتۋ بارىسىندا پەريزات قايراتقا 83,5 ميلليون تەڭگەگە الدانعانىن ايتتى.
ايتا كەتسەك، ۇكىمەت باسشىسى ولجاس بەكتەنوۆ پەريزات قايراتتىڭ ۇستىنەن قوزعالعان ىسكە قاتىستى پىكىر ءبىلدىردى.