ۇرىمجىدەن ۆەلوسيپەدپەن جولعا شىققان قازاق قىزى استاناعا جاقىنداپ قالدى

استانا. KAZINFORM - قىتايدىڭ ءۇرىمجى قالاسىنان ۆەلوسيپەدپەن جولعا شىققان بۇرلەن ەسىمدى 20 جاستاعى قازاق قىزى 2000 شاقىرىمىنان استام جولدى ارتقا تاستاپ، ەلورداعا جاقىنداپ قالدى، دەپ حابارلايدى قازاقپارات ءتىلشىسى.

بۇرلەن ادىلەت قىزى شينجاڭ ولكەسى، ءدوربىلجىن اۋدانىنىڭ تۋماسى. ول قازاقستان - قىتاي اراسىنداعى ىنتىماقتاستىقتى قولداۋ ماقساتىندا ساپارعا شىققان. قازىر قاراعاندى وبلىسىنىڭ اۋماعىندا ءجۇر. ەرتەڭ استاناعا جەتىپ، «بايتەرەك» مونۋمەنتىنىڭ جانىندا ساپارىنا نۇكتە قويۋدى جوسپارلاپ وتىر.

«بۇل ساپاردى كوپتەن بەرى ويلاستىرپ ءجۇر ەدىم. تاۋەكەلگە بەل بۋىپ، 21-شىلدە ءۇرىمجى قالاسىنان جولعا شىقتىم. كوڭىلىمدە قاتتى الاڭ بولمادى، وزىمە سەنىمدى بولدىم. بۇيىرسا مارەگە جاقىنداپ قالدىم. باستى ماقساتىم - ەكى ەلدىڭ دوستىعىن ناسيحاتتاۋ. قازاقستان مەن قىتاي اراسىنداعى ۆيزاسىز رەجيم ورناعاننان بەرى، ساياحاتشىلاردىڭ سانى ارتىپ كەلەدى. ەكى ەل اراسىنداعى دوستىق ماڭگىلىك بولسىن!»، - دەدى قازاق قىزى.

ونىڭ ايتۋىنشا، كۇننىڭ ىستىعى مەن جولداعى كەدەرگىلەر ساپار كەزىندە قيىندىق تۋدىرعان.

«كۇنىنە 100-150 شاقىرىم جول ءجۇرىپ كەلەمىن. كۇننىڭ ىستىعى ازداپ قيىندىقتار تۋدىردى. قىزۋىم كوتەرىلىپ، اۋىرعان كۇندەرىم بولدى. جولداعى قاڭعىباس يتتەردەن قاشقان كەزدەرىم بار. الدىمنان كەزدەسكەن ادامداردىڭ بارلىعى قولداۋ ءبىلدىرىپ، سۋىن بەرىپ، تاماعىمەن ءبولىسىپ، كومەكتەرىن كورسەتىپ جاتىر. «جول ازابىن جۇرگەن بىلەدى» دەمەكشى، بۇل ساپار قيىندىعى مەن قىزىعى مول، ءومىرىمنىڭ ءبىر بەلەسى رەتىندە ەستە قالارلىق ەرەكشە كۇنگە اينالارى ءسوزسىز. قازاقتىڭ كەڭ دالاسىن كورىپ، كوركەم تابيعاتىنا كوزىم تويماي كەلەدى»، - دەيدى بۇرلەن ادىلەت قىزى.

اۆتور
ريزابەك نۇسىپبەك ۇلى