ريەلتورلىق قىزمەتتى قاتاڭ مەملەكەتتىك رەتتەۋ قاجەت - ولجاس قۇسپەكوۆ

استانا. KAZINFORM - ريەلتورلىق قىزمەتتى قاتاڭ مەملەكەتتىك رەتتەۋ قاجەت. بۇل تۋرالى بۇگىن ءماجىلىستىڭ جالپى وتىرىسىندا ق ر پرەمەر-ءمينيسترىنىڭ ورىنباسارى - ۇكىمەت اپپاراتىنىڭ باسشىسى عالىمجان قويشىبايەۆقا ساۋال جولداعان دەپۋتات ولجاس قۇسپەكوۆ ايتتى.

«قازاقستاندىقتار «اربيتراجدىق باپتان» كوپ زارداپ شەگەدى. بۇل بارلىق جانجالدار تەك اربيتراجدا، ياعني جەكە سوتتا شەشىلەدى دەگەن ءسوز. ءبىراق، سۋديالاردان ايىرماشىلىعى، اربيترلەر ەشقانداي جاۋاپكەرشىلىك كوتەرمەيدى جانە ولاردى ءسوز بايلاسۋدان، سىبايلاستىقتان، الداۋ مەن الاياقتىقتان ەشتەڭە توقتاتا المايدى. اربيتراجدا شەشىلەتىن بارلىق داۋلار ريەلتورلىق كومپانيالاردىڭ پايداسىنا شەشىلدى. مەملەكەتتە ريەلتورلاردى دا، اربيتراجدىق سوتتاردى دا باقىلاۋدىڭ ەشقانداي قۇرالدارى جوق، بۇل ازاماتتاردىڭ قۇقىقتارىن قورعاۋدى تولىق قامتاماسىز ەتۋگە مۇمكىندىك جوق دەگەندى بىلدىرەدى»، - دەدى ول.

ونىڭ دەرەگىنشە، قازاقستاندا سوڭعى ءۇش جىلدا جىلجىمايتىن مۇلىكتى ساتىپ الۋ-ساتۋ وپەراتسيالارىنىڭ سانى شامامەن 1,5 ميلليون تەڭگەنى قۇرادى. Krisha.kz سايتىنداعى جىلجىمايتىن مۇلىكتى ساتۋ تۋرالى حابارلاندىرۋلاردىڭ كەم دەگەندە جارتىسىن ريەلتورلار جاريالاعان. ياعني، قازاقستاندىقتاردىڭ كوبىنە امالى قالمايدى جانە ولار ريەلتورلارمەن جۇمىس ىستەۋگە ءماجبۇر.

«ا ق ش، فرانسيا جانە باسقا دا ەۋروپا ەلدەرىنىڭ تاجىريبەسى كورسەتكەندەي، ريەلتورلىق قىزمەتتى قاتاڭ مەملەكەتتىك رەتتەۋ، ليسەنزيالاۋدى ەنگىزۋ، ەتيكالىق كودەكستى قاتاڭ ساقتاۋ، بولاشاق ريەلتورلاردىڭ جەكە باسىن جانە قىلمىس جاساعان-جاساماعانىن تەكسەرۋ قاجەت»، - دەدى ول.

وسىعا وراي دەپۋتات مىناداي ۇسىنىستار جاسادى:

- ريەلتورلىق قىزمەتتى مەملەكەتتىك رەتتەۋدى بەلگىلەۋ، ونى ليتسەنزيالاۋدى ەنگىزۋ، ريەلتورلاردى مىندەتتى وقىتۋدى جانە بىلىكتىلىك ەمتيحاندارىن تاپسىرۋدى ەنگىزۋ؛

- ەلدەگى بارلىق ريەلتورلىق كومپانيالار ءۇشىن «اربيتراجدىق باپتى» الىپ تاستايتىن ءبىر تيپتىك كەلىسىمدى ازىرلەۋ؛

- تاجىريبە، ءبىلىم، اكادەميالىق جانە كاسىبي جەتىستىكتەرى بويىنشا اربيترلەرگە قويىلاتىن تالاپتاردى ارتتىرۋ، سونداي-اق ولارعا جۇيەلى باقىلاۋ ورناتۋ جانە ءتيىستى ورگاندارعا قىزمەتى تۋرالى تۇراقتى ەسەپ بەرۋدى تالاپ ەتۋ.