قىلمىستىق ارەكەت 2025-جىلعى ساۋىردەن 2026-جىلدىڭ ساۋىرگە دەيىن جالعاسقان، دەپ حابارلايدى Kazinform اگەنتتىگىنىڭ مەنشىكتى ءتىلشىسى اۆستريالىق Heute باسىلىمى مەن جەرگىلىكتى پوليتسياعا سىلتەمە جاساپ.
اۋستريالىق ب ا ق- تىڭ حابارلاۋىنشا، قاسكۇنەمدەر ءمايىت جاتقان قابىر تاقتالارىن جىلجىتىپ، تابىتتاردى اشىپ نە جارىپ، مارقۇمداردىڭ سۇيەگىن تەكسەرگەن.
كەيبىر قابىرلەردە مارقۇمداردىڭ تىستەرىن جۇلىپ، ءتىپتى تومەنگى جاق سۇيەگىن سىندىرىپ العان. قىلمىس ءىزىن جاسىرۋ ءۇشىن اۋىر تاقتالاردى قايتا ورنىنا قويعاندىقتان، كەيبىر قابىرلەردىڭ اشىلعانى بىرنەشە اپتادان كەيىن عانا بەلگىلى بولعان.
پوليتسيا قابىرلەردى قورلاۋ جانە بۇزىپ كىرىپ، ۇرلىق جاساۋ دەرەكتەرى بويىنشا تەرگەۋ جۇرگىزىپ جاتىر. تەرگەۋشىلەر قىلمىستى بىرنەشە ادامنان قۇرالعان توپ جاساعان دەپ سانايدى. ويتكەنى اۋىر قۇلپىتاس تاقتالارى مەن زىلدەي تابىتتاردى ءبىر ادامنىڭ قوزعاپ، اشۋى قيىن. ازىرگە كۇدىكتىلەر انىقتالعان جوق، ايعاقتار دا از.
قىلمىستىق ارەكەتتەر 2024-جىلى ۆەنا مەن بۋرگەنلاندتىڭ سولتۇستىگىندە باستالىپ، كەيىن تومەنگى اۋسترياعا دەيىن تارالعان. كورنويبۋرگتە ونداعان ساعانا بۇلىنسە، گروسۆايكەرسدورفتا 50 گە جۋىق قابىر اشىلعان. قىلمىسكەرلەر بەلگىلى ءبىر ءدىني قاۋىمعا نەمەسە الەۋمەتتىك توپقا تيەسىلى ادامداردىڭ قابىرلەرىن عانا نىساناعا الماعان.
مارقۇمداردىڭ جاقىندارى ءۇشىن بۇل وقيعا اۋىر سوققى بولدى. كەيبىرى تۋىستارىنىڭ قابىرىن وزدەرى تەكسەرسە، ەندى ءبىرى كەلتىرىلگەن شىعىندى انىقتاۋ ءۇشىن ساعانالاردى ءوز قاراجاتىنا اشتىرعان. پوليتسيا ۇرلىقتى دالەلدەۋ وڭاي ەمەس ەكەنىن اتاپ ءوتتى. سەبەبى مارقۇمداردىڭ تۋىستارى ولاردىڭ التىن تىستەرى بولعانىن نەمەسە تابىتقا باعالى زاتتار سالىنعانىن بىلە بەرمەيدى.
ەسكە سالايىق، بۇعان دەيىن قازاقستاندا جەرلەۋ ءراسىمىنىڭ باعاسى وزگەرگەنىن حابارلاعانبىز.