بۇل تۋرالى Kazinform اگەنتتىگىنىڭ ەۋروپا وداعىنداعى مەنشىكتى ءتىلشىسى ب ت ا اگەنتتىگىنە سىلتەمە جاساپ حابارلايدى.
قالا اكىمىنىڭ ايتۋىنشا، ءىرى سپورتتىق جارىستار ەكونوميكانىڭ دامۋىنا سەرپىن بەرىپ، ينفراقۇرىلىمدى جاڭعىرتۋعا جول اشادى. روبەرتو گۋالتەري ريمدەگى جاڭا ستاديونداردىڭ قۇرىلىسىنا دا توقتالدى. قازىر «روما» فۋتبول كلۋبىنا ارنالعان جاڭا ارەنا سالىنىپ جاتىر. ال 2032-جىلعى ەۋروپا چەمپيوناتىنا دايىندىق اياسىندا «لاتسيو» كلۋبىنا ارنالعان سپورت نىسانىنىڭ قۇرىلىسى قاتار قولعا الىنعان.
اكىمنىڭ سوزىنشە، اتالعان جوبالار ءريمنىڭ وليمپيادا ويىندارىن وتكىزۋ جونىندەگى ءوتىنىمىن ودان ءارى نىعايتا تۇسەدى.
ەسكە سالا كەتەيىك، ريمدە وليمپيادا ويىندارى بۇعان دەيىن 1960-جىلى وتكەن. ال 2020 جانە 2024-جىلعى ويىنداردى وتكىزۋگە نيەت بىلدىرگەنىمەن، ەكى تالپىنىس تا جۇزەگە اسپادى. 2020-جىلعى جوباعا ۇكىمەت قولداۋ كورسەتپەسە، 2024-جىلعى ءوتىنىمدى سول كەزدەگى ريم مەرى ۆيردجينيا رادجي قايتارىپ العان.
ازىرگە حالىقارالىق وليمپيادا كوميتەتىنە رەسمي ءوتىنىم بەرىلگەن جوق. دەگەنمەن جوبا جۇزەگە اسىرۋعا لايىق دەپ باعالانسا، ريم بيلىگى يتاليا ۇكىمەتى جانە ۇلتتىق وليمپيادا كوميتەتىمەن (CONI) بىرلەسىپ جۇمىس ىستەۋگە دايىن.
يتاليالىق باسىلىمداردىڭ مالىمەتىنشە، CONI وليمپيادا ويىندارىن ريم مەن نەاپولدە قاتار وتكىزۋدى قاراستىرىپ جاتىر. جارىستاردىڭ ءبىر بولىگى نەاپولدە وتپەك. وليمپيادانى 2036 نەمەسە 2040-جىلى وتكىزۋ تۋرالى شەشىم ازىرگە قابىلدانعان جوق. بۇل رەتتە 2026-جىلعى ميلان مەن كورتينادا وتەتىن قىسقى وليمپيادا ويىندارىنان كەيىنگى قارجىلىق جاعداي دا ەسكەرىلىپ وتىر.
2036-جىلعى وليمپيادا ويىندارىن وتكىزۋگە ءۇندىستان، تۇركيا، چيلي جانە يندونەزيا قىزىعۋشىلىق تانىتىپ وتىر. سونداي-اق وڭتۇستىك كورەيا، وڭتۇستىك افريكا رەسپۋبليكاسى، ماجارستان، مىسىر، كانادا، ساۋد ارابياسى جانە قاتاردان دا ءوتىنىم ءتۇسۋى مۇمكىن.
بۇعان دەيىن يتالياداعى 2026-جىلعى وليمپيادا ويىندارىنا جۇمسالعان شىعىن 5 ميلليارد دوللاردان اسقانى حابارلانعان بولاتىن.