سۇحبات بارىسىندا ءانشى بيىل قىتايدا وتەتىن حالىقارالىق «Silk Way Star» جوباسىنا توقتالىپ، قازاقستان اتىنان قاتىساتىن رۋحيا بايدۇكەنوۆاعا قولداۋ ءبىلدىردى. كەزىندە رۋحيانىڭ ۇلكەن ساحنالارعا شىعۋىنا جول اشقان پريمادوننا شاكىرتىنىڭ ۆوكالدىق قابىلەتىنە جوعارى باعا بەرىپ، اق باتاسىن بەردى.
روزا رىمبايەۆا رۋحيا بايدۇكەنوۆانى شىعارماشىلىق جولىنىڭ باستاۋىنان بەرى جاقسى تانيتىنىن، ءتىپتى ونىڭ «سلاۆيان بازارى» بايقاۋىنا تاڭدالۋىنا تىكەلەي ىقپال ەتكەنىن اتاپ ءوتتى. حالىق ءارتىسىنىڭ ايتۋىنشا، رۋحيانىڭ قىتاي ساحناسىندا باعىن سىناۋى - زاڭدى قۇبىلىس.
- مەن رۋحيانى ءانشى رەتىندە وتە جوعارى باعالايمىن. ونى «سلاۆيان بازارى» تاڭداۋ كەزىندە كوميسسيا مۇشەسى رەتىندە رۋحيا بارۋى كەرەك دەپ شەشىم قابىلداعان ەدىم. ول بارىپ، جەڭىپ كەلدى. ەندى، مىنە، ديماشتان كەيىن قىتايدا تاجىريبە جيناقتاپ ءجۇر. رۋحيا - تابيعاتتان ۇلكەن دارىن بەرىلگەن ءانشى، ونىڭ دياپازونى وپەرا جۇلدىزدارىنان ءبىر دە كەم ەمەس. سوندىقتان ونىڭ قىتاي حالقىن تاڭعالدىراتىنىنا سەنەمىن، - دەدى روزا رىمبايەۆا.
50 جىل بويى ساحنانىڭ ىستىق-سۋىعىن كورگەن ءانشى حالىقارالىق بايقاۋلاردا تەك ۆوكال عانا ەمەس، تاڭدالعان رەپەرتۋاردىڭ دا ماڭىزى زور ەكەنىن ەسكەرتتى. ول رۋحيانىڭ لاۋرەاتتار قاتارىنان كورىنەتىنىنە نىق سەنىم ءبىلدىردى.
- ەڭ ءبىرىنشى - ورىندالاتىن شىعارما جوعارى دەڭگەيدە بولۋى كەرەك. ەگەر ءانىڭ ساپالى بولسا، قازىلار القاسى مەن قاتىسۋشىلار سەنى قاي تىلدە ايتساڭ دا مويىندايدى. رۋحيانىڭ مۇمكىندىگى مول، ول قازاقستاندى جاقسى دەڭگەيدە كورسەتە الادى. ونىڭ گران-پري نەمەسە بيىك لاۋرەاتتىق دارەجە يەلەنەتىنىنە سەنىمىم مول، - دەپ اق تىلەگىن جەتكىزدى.
باعدارلاما بارىسىندا ءانشى ءالي وقاپوۆ تا رۋحيانىڭ رەپەرتۋارى دۇرىس تاڭدالسا، قىتاي ەلىندە ديماشتان كەيىنگى ۇلكەن جاڭالىق بولاتىنىن ايتتى.
- قىتاي حالقى تاڭعالارلىق ۆوكالدىق فورماتتى جاقسى كورەدى. رۋحيا ءدال سونداي فورماتتا ءوزىن كورسەتە الادى، بۇعان ەش كۇمان جوق. ول بىردەن كورەرمەننىڭ كوزايىمىنا اينالىپ، ءتىپتى جەڭىمپاز بولۋى ابدەن مۇمكىن، - دەدى ءالي وقاپوۆ.
سۇحبات سوڭىندا روزا رىمبايەۆا ءوزىنىڭ 17-مامىر كۇنى استانادا وتەتىن كونسەرتىنە دە توقتالىپ، وندا تالانتتى جاستارمەن دۋەت ايتۋ جوسپاردا بار ەكەنىن جەتكىزدى.
ايتا كەتەيىك، بۇعان دەيىن Silk Way Star حالىقارالىق ۆوكالدىق بايقاۋىنىڭ جەڭىمپازى، موڭعوليادان كەلگەن ميشەل دجوزەف قازاق تىلىندە ءان جازۋدى جوسپارلاپ جۇرگەنىن مالىمدەگەن ەدى.