ەۋرووداق گازاداعى دەنساۋلىق ساقتاۋ جۇيەسىنە جاسالعان شابۋىلدارعا الاڭداۋلى

استانا. KAZINFORM – ە و مالىمەتىنشە، گازا سەكتورىندا قاقتىعىس باستالعالى 36 اۋرۋحانانىڭ 31 ى زاقىمدانعان نەمەسە تولىقتاي قيراعان.

ەۋروپالىق سىرتقى ارەكەت قىزمەتىنىڭ مالىمەتىنشە، قيراعان عيماراتتار قاتارىندا گازا سەكتورىنداعى ەڭ ءىرى مەديتسينالىق كەشەن، مۇلدە ىستەن شىققان ءال-شيفا اۋرۋحاناسى دا بار.

«گازاداعى قالعان اۋرۋحانالار جارتىلاي جانە ەلەۋلى شەكتەۋلەرمەن جۇمىس ىستەۋدە. كۇردەلى جاعدايعا بايلانىستى ولاردىڭ كوپشىلىگى كۇيرەۋ الدىندا تۇردى نەمەسە جابىلۋعا ءماجبۇر بولدى. گازاداعى پالەستينالىقتار ۇنەمى اتقىلاۋ جاعدايىندا ءومىر ءسۇرىپ جاتقاندا جانە اۋىر جاراقات العان 9 مىڭنان استام اۋىر ادام ءتيىستى مەديتسينالىق كومەكتىڭ جوقتىعىنان ءولىم اۋزىندا تۇرعان كەزدە شۇعىل مەديتسينالىق كومەككە قول جەتكىزۋ ودان دا ماڭىزدىراق بولىپ وتىر»، - دەپ اتاپ ءوتتى ەۋرووداق وكىلدەرى.

وتكەن جىلدىڭ 7-قازانىنان بەرى د د ۇ دەنساۋلىق ساقتاۋ مەكەمەلەرىنە بارلىعى 890 شابۋىلدى تىركەدى، ونىڭ 443 ى گازادا جانە 447 سى باتىس جاعالاۋدا بولدى.

«مەديتسينا قىزمەتكەرلەرىنە، اۋرۋحانالارعا جانە جەدەل جاردەم ماشينالارىنا جاسالعان شابۋىلدار ادام ءومىرى ءۇشىن اسا ماڭىزدى دەنساۋلىق ساقتاۋ قىزمەتتەرىنە زيانىن تيگىزەدى. بۇل شابۋىلدار توقتاۋى كەرەك. سونىمەن بىرگە، حالىقارالىق گۋمانيتارلىق قۇقىق بويىنشا ازاماتتىق تۇلعالاردى مىندەتتى قورعاۋعا قاتىستى ە و اۋرۋحانالاردى مەديتسينادان باسقا كەز كەلگەن ماقساتتا پايدالانۋدى قاتاڭ ايىپتايدى»، - دەپ اتاپ ءوتتى ە و ديپلوماتيالىق قىزمەتى.

ە و سونىمەن قاتار سوڭعى ايلاردا 50-دەن استام دەنساۋلىق ساقتاۋ مەكەمەسى مەن 300 جەدەل جاردەم كولىگىنە قاساقانا زاقىم كەلگەن باتىس جاعالاۋداعى دەنساۋلىق ساقتاۋ جۇيەلەرىنە شابۋىلداردىڭ جالعاسۋىنا الاڭدايدى.

«ءبىزدىڭ كوز الدىمىزدا ناقتى ۋاقىتتا ادام تراگەدياسى بولىپ جاتىر. ەۋروپالىق وداق گازا سەكتورىنداعى بەيبىت تۇرعىنداردىڭ زارداپ شەگۋىنە قاتتى الاڭداۋلى. ءبىز دەرەۋ اتىستى توقتاتۋعا، بارلىق كەپىلگە الىنعانداردى بوساتۋعا جانە تولىق گۋمانيتارلىق كومەككە قول جەتكىزۋگە شاقىرامىز»، - دەپ اتاپ ءوتتى بريۋسسەل.

اۆتور

زارينا تۋعانبايەۆا