«روس اتومعا» سانكسيا سالىنسا، قازاقستانعا ا ە س سالۋى مۇمكىن ۆەندورلاردىڭ قاتارىنان شىعارىلا ما - مينيستر جاۋابى

استانا. KAZINFORM - ۇكىمەت وتىرىسىنان كەيىن وتكەن باسپا ءسوز ءماسليحاتىندا ەنەرگەتيكا ءمينيسترى الماسادام ساتقاليەۆ قازاقستاندا ا ە س سالۋدان ءۇمىتتى ءتورت ۆەندوردىڭ ءبىرى «روس اتومنىڭ» سانكسيا قۇرساۋىندا قالۋ ىقتيمالدىعى تۋرالى پىكىر ءبىلدىردى.

«ا ق ش سەناتىندا جاتقان زاڭ جوباسى ماقۇلدانىپ، «روس اتوممەن» ارىپتەستىك ورناتقان تاراپتارعا سانكسيا سالۋ تۋرالى شەشىم قابىلدانسا، بۇل كاسىپورىن قازاقستاندا ا ە س سالۋدان ءۇمىتتى ۆەندورلاردىڭ قاتارىنان شىعارىلا ما؟» - دەپ سۇرادى ب ا ق وكىلى.

«بىرىنشىدەن، ازىرگە ناقتى ۆەندور تۋرالى ايتۋ ەرتە. ال سانكسيا ماسەلەسىنە كەلسەك، قازاقستان رەسپۋبليكاسى بۇكىل حالىقارالىق سانكسيالاردى ۇستانۋشى ەل ەكەنىن ۇنەمى ايتىپ ءجۇرمىز. ياعني، ءبىز ءبىر دە ءبىر سانكسيالىق رەجيمنەن اۋىتقىمايمىز جانە ونى ورىندايمىز. ىشكى ساياساتتا دا، حالىقارالىق ساياساتتا دا حالىقارالىق قۇقىق نورمالارىن ۇستانامىز. قازىرگى تاڭدا «روس اتوم» كورپوراتسياسى سانكسياداعى كاسىپورىن بولىپ ەسەپتەلمەيدى. بۇل جاعدايدى باقىلاپ وتىرمىز»، - دەدى ەنەرگەتيكا ءمينيسترى.

ۆەدومستۆو باسشىسى اۋەلى رەفەرەندۋم وتكىزىپ الۋ ماڭىزدى بولىپ تۇرعانىن ايتتى.

«قازاقستان بۇكىل حالىقارالىق سانكسيالاردىڭ تالابىن ورىندايتىنى ءسوزسىز»، - دەدى الماسادام ساتقاليەۆ.

ۇكىمەت وتىرىسىندا پرەمەر-مينيستر ولجاس بەكتەنوۆ ا ە س سالۋ تۋرالى شەشىم قابىلدانسا، قۇرىلىستىڭ جوباسى مەن بارىسىن كىم قاداعالايتىنىن ايتتى.

«زاماناۋي اتوم ەلەكتر ستانسيالارى كوپ دەڭگەيلى قاۋىپسىزدىك جۇيەسىمەن جابدىقتالعان. قازاقستاندا اتوم ەلەكتر ستانسياسىن سالۋ تۋرالى شەشىم قابىلدانعان جاعدايدا ونى جوبالاۋ، سالۋ جانە پايدالانۋ كەزىندە ماگاتە- ءنىڭ حالىقارالىق قاۋىپسىزدىك ستاندارتتارى قاتاڭ باسشىلىققا الىناتىن بولادى»، - دەدى ۇكىمەت باسشىسى.

سونداي-اق ول قازاقستاندا ا ە س سالىنسا، ۋران باعاسىنىڭ اۋىتقۋى بىزدەگى ەلەكتر قۋاتىنىڭ تاريفىنە اسەر ەتپەيدى دەپ سەندىردى.

«سونىمەن قاتار شيكىزات بازاسى وزىمىزدە، ياعني ۋران باعاسىنىڭ اۋىتقۋى بىزگە اسەرىن تيگىزبەيدى. بۇل ەلەكتر ەنەرگياسىنا تۇراقتى ءارى بولجامدى تاريفتەردى قامتاماسىز ەتۋگە مۇمكىندىك بەرەدى»، - دەدى پرەمەر- مينيستر.

اۆتور

مارلان جيەمباي