ەۋروكوميسسيا ورماندى كەسۋگە قارسى زاڭنىڭ ەنگىزىلۋىن كەيىنگە قالدىردى

استانا. KAZINFORM - ىسكە اسىرۋداعى قيىندىقتارعا بايلانىستى ەۋروپالىق كوميسسيا ورماندى كەسۋگە قارسى زاڭنىڭ ورىندالۋىن كەيىنگە قالدىرۋدى ۇسىندى. بۇل باستاماعا ۇكىمەتتىك ەمەس ۇيىمدار نارازىلىق ءبىلدىردى، دەپ حابارلايدى Euronews.

ەۋروپالىق كوميسسيا جاھاندىق ورمانداردىڭ جويىلۋىمەن كۇرەسۋ تۋرالى قاۋلى قابىلداۋدى ءبىر جىلعا كەيىن قالدىرۋدى ۇسىنىپ وتىر. ءتيىستى زاڭ ەۋروپالىق نارىققا شىعۋدى جانە ءوندىرىسى ورمان سىلەمدەرىن كەسۋگە ىقپال ەتەتىن ونىمدەر ەكسپورتىن رەتتەۋگە ارنالعان. بۇل نەگىزىنەن كوفە، سويا، كاكاو، پالما مايى جانە اعاشقا قاتىستى.

ەۋروپالىق كوميسسيا زاڭنىڭ قابىلدانۋىن كەيىنگە قالدىرۋ باستاماسىن اتاپ ايتقاندا ەلدەر مەن سالالىق توپتاردىڭ بىركەلكى دايىن ەمەستىگىمەن تۇسىندىرەدى.

«ءبىز ەۋروپالىق كوميسسيانىڭ مۇنداي شەشىم قابىلداعانىنا قاتتى وكىنەمىز. EUDR (ە و ورمانداردى كەسۋگە قارسى كۇرەس ەرەجەسى) شىنىمەن دە ورماندى كەسۋگە، ورمانسىزدانۋعا قارسى كۇرەس جۇرگىزۋدە جانە اعاش ونىمدەرىن شىعاراتىن جانە ولاردى ەۋروپاعا جەتكىزەتىن كومپانيالاردىڭ بيزنەس ۇلگىسىن ناقتى وزگەرتۋگە شىنىمەن دە الەۋەتى بار. سوندىقتان ءيا، بۇل وتە وكىنىشتى. بۇل وسى ەرەجەنىڭ بولاشاعى ءۇشىن جامان سيگنال بەرەدى»، - دەدى بريۋسسەلدەگى ClientEarth بيۋروسىنىڭ ديرەكتورى انايس بەرتە.

وسى اپتادا جاريالانعان ۇسىنىس ءىرى كومپانيالار ءۇشىن كەلەسى جىلدىڭ 30 -جەلتوقسانىنان جانە شاعىن جانە ورتا بيزنەس ءۇشىن 2026 -جىلدىڭ 30-ماۋسىمىنان باستاپ جاڭا ەرەجەلەر ەنگىزۋدى قاراستىرىپ وتىر.