ەۋروكوميسسيا باسشىسى ە و-نىڭ ا ق ش تاريفتەرىنە قاتىستى شارالارىن جاريالادى

استانا. KAZINFORM - دونالد ترامپ 2 -ءساۋىردى امەريكانى «ازات ەتۋ كۇنى» دەپ جاريالاپ، بارلىق ەلگە قارسى جاپپاي ساۋدا تاريفتەرىن ەنگىزۋ كۇنى ەتىپ بەلگىلەدى.

ەۋروكوميسسيا باسشىسى ۋرسۋلا فون دەر ليايەن مۇنداي ساياسات ەشكىمنىڭ مۇددەسىنە ساي كەلمەيتىنىن مالىمدەدى.

ەۋرو وداقتىڭ قولىندا دونالد ترامپتىڭ امەريكانىڭ بارلىق ساۋدا سەرىكتەسىنە جاپپاي تاريفتەر ەنگىزۋ جوسپارىن كەلىسسوزدەر جۇرگىزۋ، ۇستاۋ جانە قاجەت بولعان جاعدايدا «ارتقا يتەرۋ» ءۇشىن پايدالانا الاتىن «كوپ كارتالارى» بار، دەپ اتاپ ءوتتى ۋرسۋلا فون دەر ليايەن.

ا ق ش-تىڭ بارلىق ساۋدا سەرىكتەسىنە اسەر ەتەتىن جاڭا تاريف پاكەتى قازىردىڭ وزىندە بولات، اليۋميني جانە اۆتوموبيلدەرگە 25 پايىزدىق باج سالىعى ەنگىزىلگەن ە و- دا الاڭداۋشىلىق تۋدىرىپ وتىر.

ەۋروپالىق كوميسسيا ولارعا قارسى شارالاردى ۇسىندى، ءبىراق ولاردى ەنگىزۋدى ءساۋىر ايىنىڭ ورتاسىنا دەيىن قالدىردى.

بريۋسسەل جانجالدى بەيبىت جولمەن شەشۋدى تالاپ ەتىپ وتىر، ءبىراق ونىڭ جاۋاپ رەتىندەگى قادامدارىندا «قىزىل سىزىقتار» بولمايتىنىن ەسكەرتتى.

فون دەر ليايەننىڭ ايتۋىنشا، تاريفتەر قاراپايىم تۇتىنۋشىلار ءۇشىن باعانىڭ كوتەرىلۋىنە اكەلەدى، جۇمىس ورىندارىنا قاۋىپ توندىرەدى، كەدەندە «بيۋروكراتيالىق قۇبىجىق» جاسايدى جانە ءوز تاۋارلارىن ەۋروپاعا ەكسپورتتايتىن امەريكالىق كومپانيالار ءۇشىن «سۇمدىققا» اينالادى.

ول سونداي-اق تاريفتەر ترامپتىڭ امەريكانى قايتا يندۋستريالاندىرۋ تۋرالى كوپ ايتىلعان كۇن تارتىبىنە قايشى كەلەدى دەپ بولجادى.

- بۇل تەكەتىرەس ەشكىمنىڭ مۇددەسىنە ساي ەمەس، - دەدى ول.

ءوز سوزىندە فون دەر ليايەن كوميسسيانىڭ ماقساتى اتلانت مۇحيتىنىڭ ەكى جاعالاۋى اراسىنداعى جاپپاي ساۋدا سوعىسىنىڭ الدىن الۋ ءۇشىن «كەلىسسوزدەر ارقىلى شەشىم» بولاتىنىن ايتتى.

- ءبىز بۇل كەلىسسوزدەرگە كۇش پوزيتسياسىنان كەلەمىز. ەۋروپا ءوز قولىندا كوپتەگەن كارتا ۇستاپ وتىر: ساۋدادان تەحنولوگياعا جانە ءبىزدىڭ نارىقتىڭ كولەمىنە دەيىن، - دەپ اتاپ ءوتتى ە و اتقارۋشى بيلىگىنىڭ باسشىسى.

ول قوسىپ وتكەندەي، ەگەر كەلىسسوز ىمىراعا اكەلمەسە، بريۋسسەل بارلىق نۇسقالارى بار «قاتاڭ قارسى شارالار» قابىلداۋدان تارتىنبايدى.

ە و تاۋارلارعا باجبەن عانا ەمەس، قىزمەتتەرگە دە شەكتەۋلەرمەن جاۋاپ بەرە الادى. 2023 -جىلى ە و-دا ا ق ش- پەن تاۋار ساۋداسىندا (156,6 ميلليارد ەۋرو) پروفيتسيتكە جانە قىزمەتتەردە (108,6 ميلليارد ەۋرو) تاپشىلىق بولدى.

فون دەر ليايەن شيەلەنىسۋدى بولدىرماۋ ءۇشىن كەلىسسوز جۇرگىزۋگە شاقىردى، ءبىراق سونىمەن بىرگە ە و كوشباسشىلارىمەن ورتاق ارەكەتتى ۇيلەستىرىپ وتىر. الايدا ەلدەر ءوز ەكونوميكالارىنا زيان كەلتىرۋدەن قورقىپ، ورتاق پىكىرگە كەلە الماي وتىر.

بۇعان دەيىن ە و ترامپ تاريفتەرى سالدارىنان 13,1 ميلليارد ەۋرو شىعىنعا ۇشىراۋى مۇمكىن ەكەنىن جازعان بولاتىنبىز.

اۆتور

زارينا تۋعانبايەۆا