پروكۋرورلار سوتتاعى ءسوزىن دايىنداۋ ءۇشىن جاساندى ينتەللەكت تەحنولوگياسىن قولدانباقشى

استانا. KAZINFORM - باس پروكۋراتۋرا 2024 -جىلدىڭ ءبىرىنشى جارتى جىلدىعىندا اتقارىلعان جۇمىستارعا قورىتىندى جاسادى. پروكۋراتۋرا ورگاندارىنىڭ زاڭدىلىقتى ساقتاۋ، قۇقىق ءتارتىبىن قامتاماسىز ەتۋ جانە قىلمىستىلىقپەن كۇرەس بويىنشا قاداعالاۋ قىزمەتىنىڭ ناتيجەلەرى بەلگىلى بولدى. بۇل تۋرالى قازاقستان رەسپۋبليكاسىنىڭ باس پروكۋرورى بەرىك اسىلوۆ «ەگەمەن قازاقستان» گازەتىنە بەرگەن سۇقباتىندا ايتتى.

«ءبىزدىڭ جۇمىسىمىزدا باسىمدىق بەرىلەتىن باعىتتاردىڭ ءبىرى - باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ الەۋەتىن ارتتىرۋ. اتالعان كوميتەت جاڭا سيفرلى جانە يننوۆاتسيا تەحنولوگيالاردى ەنگىزۋ، جاساندى ينتەللەكتتى قولدانۋ بويىنشا ۇلكەن جۇمىستار جاساپ جاتىر. پروكۋروردىڭ سوتتاعى ءسوزىن دايىنداۋ ءۇشىن جاساندى ينتەللەكت تەحنولوگياسىن قولداناتىن يننوۆاتسيالىق مودۋل ازىرلەندى»، - دەدى باس پروكۋرورى بەرىك اسىلوۆ.

ونىڭ ايتۋىنشا، قىلمىستىق جانە اكىمشىلىك سوت وندىرىستەرى، تەكسەرۋلەر تاعايىنداۋ، ازاماتتاردىڭ وتىنىشتەرىنە قاراۋ سيفرلاندى. اكىمشىلىك قۇقىق بۇزۋشىلىقتاردىڭ ءبىرىڭعاي ءتىزىلىمى، تەكسەرۋ سۋبەكتىلەرى مەن وبەكتىلەرىنىڭ ءبىرىڭعاي ءتىزىلىمى، «تالداۋ ورتالىعى»، «قۇقىق قورعاۋ، ارنايى جانە باسقا دا ورگانداردىڭ اقپارات الماسۋ جۇيەسى» جانە «قاداعالاۋ» ب ا ت ج جاسالىپ، جۇمىس اتقارىلىپ جاتىر.

بۇعان دەيىن ۇكىمەت 5 جىلدىق جاساندى ينتەللەكتتى دامىتۋ تۇجىرىمداماسىن قابىلداعانىن جازعان بولاتىنبىز.

اۆتور
باقىتگۇل اباي قىزى