پروكۋرور سالتانات نۇكەنوۆانىڭ ۇيالى تەلەفونىنداعى جازبا، سۋرەتتەردى جاريالادى

استانا. KAZINFORM - استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ەكس-مينيستر قۋاندىق بيشىمبايەۆقا قاتىستى سوت وتىرىسى جالعاسىپ جاتىر.

بۇگىنگى سوت پروتسەسى مارقۇم سالتانات نۇكەنوۆانىڭ ۇيالى تەلەفونىن زەرتتەۋدەن باستالدى.

پروكۋرور WhatsApp جەلىسىندەگى س. نۇكەنوۆا مەن ق. بيشىمبايەۆتىڭ حات الماسۋ ءماتىنىن جاريالادى. ونىڭ ىشىندە اۋديو جازبالار دا بار.

بيشىمبايەۆ مارقۇم سالتاناتتىڭ ۇيالى تەلەفونىندا «ماحابباتىم» دەگەن اتپەن ساقتالعان ەكەن.
جازبالاردىڭ بىرىنە توقتالساق، 2023 -جىلدىڭ 8-قاراشاسىندا بيشىمبايەۆ سالتاناتقا بىلاي دەپ جازادى:

«سالتا، سەن ماعان دەزودورانتقا تاپسىرىس بەرمەدىڭ بە؟ مەن سپورت زالىندامىن، ەندى ەسىمە ءتۇستى. ادەتتەگىدەي ۇمىتتىڭ با؟»، - دەيدى بيشىمبايەۆ.

وعان سالتانات بىلاي جاۋاپ بەرەدى:

«تاپسىرىس بەردىم، جانىم. قازىر اكەلەدى. وتكەن جولى مەن كۋرەرگە كەيىنىرەك تاپسىرىس بەرگىم كەلگەن. قازىر بەرەمىن ساعان. كەشىرشى، وتىنەمىن. بۇگىن مەن SMM بويىنشا تاعى ءبىراز جۇمىس ىستەدىم. سەن ءالى جولداسىڭ با؟»، - دەپ س. نۇكەنوۆا جاۋاپ قاتقان.

ەسكە سالساق، 2023 -جىلى 9-قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى. مۇنان سوڭ ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

وتكەن جىلى 15-قاراشادا وتكەن كەڭەستە مەملەكەت باسشىسى قاسىم-جومارت توقايەۆ ىشكى ىستەر مينيسترىنە ق. بيشىمبايەۆتىڭ ءىسىن ەرەكشە باقىلاۋعا الۋدى تاپسىردى. بيىل 11-قاڭتاردا ەلوردا سوتى قۋاندىق بيشىمبايەۆتى كۇزەتپەن ۇستاۋ مەرزىمىن 2 ايعا ۇزارتقان ەدى، 26-اقپاندا قۋاندىق بيشىمبايەۆتىڭ ءىسى سوتقا ءتۇستى.

1-ناۋرىزدا قۋاندىق بيشىمبايەۆتىڭ ءىسى بويىنشا الدىن الا تىڭداۋ كۇنى بەلگىلەندى. 11-ناۋرىز كۇنى استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءىس بويىنشا الدىن الا تىڭداۋ ءوتتى. الدىن الا تىڭداۋ 12-ناۋرىزدا جالعاستى.

27-ناۋرىزدا ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق. بيشىمبايەۆتىڭ ءىسى بويىنشا القابيلەردى ىرىكتەۋ ءوتتى. 29-ناۋرىزداعى سوت وتىرىسىندا مارقۇم سالتانات نۇكەنوۆانىڭ اعاسى ايتبەك امانگەلدى كۋاگەر رەتىندە جاۋاپ بەرىپ، قۋاندىق بيشىمبايەۆ پەن سالتانات نۇكەنوۆانىڭ اراسىنداعى العاشقى ۇرىس-كەرىستەر قالاي باستالعانى تۋرالى مالىمەتتەر ايتتى جانە مارقۇمنىڭ بەت-الپەتى كوگەرگەن سۋرەت كورسەتتى.

1-ساۋىردەگى سوت وتىرىسىندا ايىپتالۋشى قۋاندىق بيشىمبايەۆ مارقۇم س. نۇكەنوۆانىڭ تۋىستارىنان كەشىرىم سۇرادى.

سونداي-اق سوت ەكس-مينيستر قۋاندىق بيشىمبايەۆتىڭ ىسىندەگى تاراپتارعا الەۋمەتتىك جەلىدە پىكىر بىلدىرۋگە تىيىم سالدى.

اۆتور
ورالحان قوجانوۆ