پروكۋراتۋرا اقجارقىن تۇرلىبايدى قىتايدان قايتارۋ تۋرالى: جاقىندا وڭ شەشىم بولىپ قالادى

استانا. KAZINFORM - ق ر باس پروكۋرورىنىڭ ورىنباسارى عالىمجان قويگەلديەۆ قىتايدا سوتتالعان اقجارقىن تۇرلىبايدى قازاقستانعا قايتارۋ كەلىسسوزدەرى جالعاسىپ جاتقانىن ايتتى.

بۇگىن سەناتتىڭ جالپى وتىرىسىنان كەيىنگى باسپا ءسوز ءماسليحاتىندا تىلشىلەر: «الەۋمەتتىك جەلىدە اقجارقىن تۇرلىباي قازاقستانعا ورالدى دەگەن اقپارات جاريالاندى. بۇل قانشالىقتى راس؟» - دەپ سۇراعان ەدى.

ءوز كەزەگىندە عالىمجان قويگەلديەۆ قازىر ق ر سىرتقى ىستەر مينيسترلىگى مەن باس پروكۋراتۋرا قازاقستان ازاماتىن قىتايدان قايتارۋعا بار كۇش-جىگەرىن سالىپ جاتقانىن ايتتى.

«بۇل جۇمىس توقتامادى، ياعني بەلسەندى تۇردە اتقارىلىپ جاتىر. جاقىن ارادا بۇل جاعداي بويىنشا وڭ شەشىم بولىپ قالادى دەپ سەنەمىن. اتاپ ايتقاندا، بۇل باعىتتا جۇمىستار وڭاي ەمەس»، - دەدى باس پروكۋروردىڭ ورىنباسارى.

ونىڭ سوزىنە قاراعاندا، بۇعان دەيىن اقجارقىن تۇرلىباي جازاسىن قازاقستاندا وتەۋگە قاتىستى ارىزىن جولداعان.

ايتا كەتۋ كەرەك، اقجارقىن تۇرلىباي 2014 -جىلدىڭ ناۋرىز ايىندا قىتايدىڭ مالايزيامەن شەكاراسىندا ەسىرتكىمەن ۇستالعان بولاتىن.

ونىڭ جۇك سومكەسىنەن 4,5 كەلى ەسىرتكى تابىلىپ، اقجارقىن بۇل تۋرالى بىلمەيتىنىن مالىمدەگەن. وسى ءىس بويىنشا قىتايدىڭ گۋاڭجوۋ سوتى اقجارقىن تۇرلىبايدى ەسىرتكى كونترابانداسىمەن ايىپتاپ، ءومىر بويىنا باس بوستاندىعىنان ايىردى.

اۆتور
رۋسلان عابباسوۆ