3-قاراشادا پاريجدە وتكەن ماراپاتتاۋ راسىمىندە گونكۋر اكادەمياسىنىڭ توعىز مۇشەسىنىڭ التاۋى جاەناداعا داۋىس بەرگەن. جازۋشىنىڭ 530 بەتتەن تۇراتىن رومانى 1949 -جىلى پاريجدە جۇمباق جاعدايدا ولتىرىلگەن 29 جاستاعى لۋيزا كانسونىڭ تاعدىرىن باياندايدى. اۆتور پوليتسيا مۇراعاتتارىن زەرتتەپ، قىلمىس بولعان جەرلەردى ارالاپ، ونداعان جىل بويى اشىلماعان ءىستىڭ ءمان-جايىن انىقتاۋعا تىرىسقان.
ءبىر قىزىعى، ءوزىن ەسكى مەكتەپتىڭ جازۋشىسى سانايتىن جاەنادا ءتىپتى ۇيالى تەلەفون دا ۇستامايدى. سوعان قاراماستان، ول رومانىن جازۋ كەزىندە ChatGPT جانە Claude سياقتى جاساندى ينتەللەكت قۇرالدارىنا جۇگىنگەنىن جاسىرمايدى.
4-قاراشادا France Inter راديوسىنا بەرگەن سۇحباتىندا جازۋشى جاساندى ينتەللەكتىنى ءۇش رەت پايدالانعانىن ناقتىلادى. ونىڭ ىشىندە ChatGPT قۇراستىرعان ءبىر سويلەمدى وقىرمانمەن وزىنشە ويىن رەتىندە رومانعا ەنگىزگەن. سونداي-اق تەحنولوگيانى زەرتتەۋ جۇمىستارىنا جانە تەحنيكالىق اقپاراتتى تەكسەرۋگە قولدانعان.
«ءبىز جاساندى ينتەللەكت جوق سياقتى ءومىر سۇرە المايمىز. ونى پايدالانۋدى، ءتۇسىنۋدى ۇيرەنۋىمىز كەرەك. ەڭ باستىسى - ونىڭ ءبىزدى الماستىرۋىنا جول بەرمەۋ»، - دەيدى جازۋشى.
الايدا ول جاساندى ينتەللەكت ادامنىڭ شىعارماشىلىق قابىلەتىن تولىق الماستىرا المايتىنىنا سەنىمدى. ونىڭ پىكىرىنشە، تەحنولوگيا قانشالىقتى دامىسا دا، ادامنىڭ جان دۇنيەسىن، ەستەلىكتەرىن جانە ومىرگە دەگەن جەكە كوزقاراسىن ءدال سول كۇيىندە جەتكىزە المايدى.