ەۋروپانىڭ كۋرورتتىق قالالارىنا ۇشاق قاتىنايتىن بولدى

استانا. قازاقپارات - Air Astana اۋە كومپانياسى ەۋروپانىڭ كورىكتى قالالارى يراكليونعا (گرەكيا) جانە پودگوريتساعا (چەرنوگوريا) ماۋسىمدىق جازعى رەيستەردىڭ قايتا باستالاتىنى تۋرالى حابارلادى.

«الماتىدان كريت ارالىندا ورنالاسقان يراكليونعا رەيستەر 6-ماۋسىمدا دۇيسەنبى، بەيسەنبى جانە سەنبى كۇندەرى اپتاسىنا 3 رەت جيىلىكپەن باستالادى. ۇشۋلار Airbus A321LR اۆيالاينەرىندە 6 ساعات 30 مينۋت ۇشۋ ۇزاقتىعىمەن ورىندالادى. قازاقستان ازاماتتارىنا گرەكياعا كىرۋ ءۇشىن شەنگەن ۆيزاسى قاجەت. يراكليوننان افيناعا جەرگىلىكتى تۇراقتى رەيستەرمەن جەتۋگە بولادى، ولار شامامەن ءبىر ساعاتتى الادى، سونداي- اق پاروممەن تانىمال سانتوريني ارالدارىنا دەيىن جەتۋگە بولادى.

بارلىق الىمدارمەن ەكى جاققا بيلەتتىڭ ەڭ تومەنگى قۇنى ەكونوم- كلاستا 307959 تەڭگە» دەلىنگەن حابارلامادا.

سونداي- اق، اۋە كومپانياسى چەرنوگوريانىڭ استاناسى پودگوريتساعا ۇشاقپەن بارۋ مۇمكىن بولاتىنىن مالىمدەدى.

«الماتىدان رەيستەر 8-ماۋسىمنان باستاپ سەيسەنبى، جۇما جانە سەنبى كۇندەرى قاتىنايدى، ال استانادان پودگوريتساعا رەيستەر 9-ماۋسىمنان باستاپ دۇيسەنبى، بەيسەنبى جانە جەكسەنبى كۇندەرى جۇزەگە اسىرىلادى. 2024 -جىلعى 1-مامىردان 31-قازانعا دەيىن قازاقستان ازاماتتارى ءۇشىن چەرنوگورياعا 30 كۇنگە دەيىن ۆيزاسىز كىرۋگە بولادى.

الماتىدان پودگوريتساعا بارلىق الىمدارمەن ەكى جاققا بيلەتتىڭ ەڭ تومەنگى قۇنى ەكونوم- كلاستا 282551 تەڭگەدەن باستالادى.

رەيستەردىڭ ۇشۋ ۇزاقتىعى A321LR ۇشاعىمەن الماتىدان 6 ساعات 55 مينۋت، استانادان 6 ساعات 30 مينۋت» دەپ حابارلادى اۋە كومپانياسى.

بيلەتتەردى airastana.com اۋە كومپانياسىنىڭ سايتىنان، سونداي-اق برونداۋ جانە اقپارات ورتالىعىنان، اۋە كومپانيانىڭ ساتۋ كەڭسەلەرىنەن، تۋريستىك اگەنتتىكتەردەن ساتىپ الۋعا بولادى.