ەۋروپانىڭ بەدەلدى جۋرنالى ەلىمىزدىڭ تۋريستىك الەۋەتىن ناسيحاتتايدى
استانا. KAZINFORM - ەۋروپانىڭ بەدەلدى Porschist Magazine جۋرنالى قازاقستان تۋرالى ارنايى شىعارىلىم ازىرلەپ جاتىر. بۇل باسىلىمدا ەلىمىزدىڭ كوركەم تابيعاتى، ساۋلەت نىساندارى مەن مادەني مۇراسى كەڭىنەن تانىستىرىلادى.
بۇل تۋرالى «Jibek Joly» تەلەارناسىندا «Kazakh Tourism» ۇلتتىق كومپانياسىنىڭ حالىقارالىق نارىقتار دەپارتامەنتىنىڭ مامانى دىنمۇحامەد كەنجەبايەۆ مالىمدەدى.
جوبانىڭ اياسىندا ءتۇسىرىلىم توبى الماتى، استانا، تۇركىستان قالالارى مەن بۋراباي، شارىن شاتقالى سياقتى كورنەكتى تۋريستىك ورىنداردى ارالاپ شىققان. ارنايى شىعارىلىم 2026 -جىلدىڭ ناۋرىز ايىندا جارىق كورەدى.
- Porschist Magazine جۋرنالى بەلگيادا جارىق كورەدى جانە ەۋروپا اۋماعىندا تاراتىلادى. يدەيا جۋرنال رەداكسياسىنان ءتۇستى. ولار قازاقستانعا كەلىپ، ارنايى شىعارىلىم ازىرلەۋ نيەتىن ءبىلدىرىپ، بەلگياداعى قازاقستان ەلشىلىگىنە جۇگىنگەن. «Kazakh Tourism» بۇل باستامانى قولدادى. جوبا ەلىمىزدىڭ حالىقارالىق يميدجىن ارتتىرۋدا ماڭىزدى ءرول اتقارادى. ءتۇسىرىلىم الماتى جانە الماتى وبلىسىنان باستالدى، كەيىن تۇركىستان قالاسىندا جالعاستى. سودان سوڭ استانا مەن اقمولا وبلىسىندا ءتۇسىرىلىم جۇرگىزىلدى، - دەدى سپيكەر.
ونىڭ ايتۋىنشا، جوبا قازاقستاندى جاڭا قىرىنان تانىتىپ، حالىقارالىق اۋديتوريا ءۇشىن تىڭ كوكجيەكتەر اشادى.
- ءبىز ەرەكشە اسەر مەن ەرەكشە باعىتتاردى ىزدەيتىن تۋريستەرگە قازاقستاننىڭ جاڭا بەينەسىن ۇسىنعىمىز كەلەدى. ەلىمىز تەك تۋريستىك باعىت قانا ەمەس، سونىمەن قاتار شابىت پەن تاڭدانىس سىيلايتىن ەل ەكەنىن كورسەتكىمىز كەلەدى، - دەدى ول.
سونداي-اق ول ءوز سوزىندە، Porschist Magazine 2000 -جىلدان بەرى شىعىپ كەلە جاتقان بەدەلدى باسىلىم. فرانسيا، نيدەرلاند، موناكو جانە شۆەيساريا سياقتى مەملەكەتتەردىڭ وقىرمانىن قامتيدى. بۇعان دەيىنگى سوڭعى ارنايى شىعارىلىمدار ءۇندىستان، اۋستراليا، ساۋد ارابياسى ەلدەرىنە ارنالعان.
سونىمەن قاتار دىنمۇحامەد كەنجەبايەۆتىڭ ايتۋىنشا، بيىلعى قىركۇيەك ايىندا ۇلى بريتانيانىڭ ەكى جەتەكشى باسىلىمى - The Telegraph جانە The Times جۋرناليستەرى قازاقستانعا ارنايى ساپارمەن كەلىپ، تۋريستىك باعىتتا ماتەريال ازىرلەۋى جوسپارلانىپ وتىر.
ەسكە سالايىق، قازاقستاندا ىشكى جانە كەلۋ تۋريزمىن دامىتۋ ماقساتىندا بيزنەسكە مەملەكەتتىك قولداۋدىڭ جەتى تەتىگى قاراستىرىلعانىن حابارلاعانبىز.