ەۋروپالىق كەڭەس «دايش» پەن «ءال-كايداعا» قارسى سانكسيالار مەرزىمىن ۇزارتتى

استانا. KAZINFORM - بۇگىن ەۋروپالىق كەڭەس «دايش» پەن «ءال-كايداعا»، سونداي-اق وسى ۇيىمدارمەن بايلانىسى بار توپتارعا، جەكە تۇلعالارعا، كاسىپورىندار مەن ۇيىمدارعا قارسى شەكتەۋ شارالارىنىڭ مەرزىمىن ۇزارتتى.

ە و سانكسيالارى ءبىر جىلعا - 2025-جىلدىڭ 31-قازانىنا دەيىن ۇزارتىلدى.

قازىرگى ءتىزىم 15 ادامعا جانە 6 توپقا قاتىستى. وندا اتالعانداردىڭ اكتيۆتەرى توقتاتىلادى، ال جەكە تۇلعالارعا ە و- عا كىرۋگە تىيىم سالىنادى.

سونىمەن قاتار، ە و- نىڭ جەكە جانە زاڭدى تۇلعالارىنا سانكسيالار تىزىمىنە ەنگىزىلگەن تۇلعالارعا قاراجات، قارجىلىق اكتيۆتەر نەمەسە ەكونوميكالىق رەسۋرستار بەرۋگە تىيىم سالىنادى.

بريۋسسەلدە ەۋرووداق لاڭكەستىك شابۋىلداردى جوسپارلاۋ، قارجىلاندىرۋ جانە جۇزەگە اسىرۋ، سونداي-اق بۇكىل الەم بويىنشا لاڭكەستىك ناسيحاتتى تاراتۋ ارقىلى حالىقارالىق بەيبىتشىلىك پەن قاۋىپسىزدىككە قاتەر توندىرەتىندەرمەن كۇرەسۋگە دايىن ەكەنى باسا ايتىلدى.

2016-جىلدىڭ قىركۇيەگىنەن باستاپ ەۋرووداق «دايش» پەن «ءال-كايداعا»، سونداي-اق ولارمەن بايلانىستى ادامدارعا، توپتارعا، كاسىپورىندار مەن ۇيىمدارعا قارسى ءوز بەتىنشە سانكسيالار ەنگىزدى.

بۇعان دەيىن «ۇلكەن جەتىلىككە» مۇشە مەملەكەتتەر تاياۋ شىعىستاعى اۋقىمدى ايماقتىق سوعىستى قالاي توقتاتۋ كەرەكتىگى تۋرالى كەلىسىمگە كەلە المادى. ە و- نىڭ ساۋد ارابياسىنداعى بۇرىنعى ەلشىسى لۋيدجي ناربونەنىڭ ايتۋىنشا، شيەلەنىستى جەڭىلدەتۋ جونىندەگى ديپلوماتيالىق قارىم-قاتىناس ناقتى ناتيجەلەرگە اكەلگەن جوق.

ەۋروپالىق وداق ەلدەرىنىڭ كوپشىلىگى ءوز ازاماتتارىن ليۆان اۋماعىنان كەتۋگە شاقىردى.