ەۋروپالىق ۇشاتىن كولىك تەحنولوگياسى قىتايعا ساتىلدى
استانا. KAZINFORM - ەۋروپادا جاسالعان، سىناقتان ءساتتى وتكەن ۇشاتىن كولىكتىڭ تەحنولوگياسىن قىتايلىق كومپانيا ساتىپ الدى. قىتايعا جاڭا تەحنولوگيا بەرمەۋگە باتىستىق ەلدەردىڭ قاۋقارى جەتپەيتىن سياقتى.
كادىمگى كولىكتەن ەكى مينۋت ىشىندە ۇشاققا اينالاتىن گيبريدتى قىتايلىق كومپانيا ساتىپ العانى تۋرالى bbc.com سايتى جاريالادى. Aikyn.kz مۇنداي تەحنولوگيالىق ترانسفەرتتىڭ ماعىناسىن بريتاندىق باسىلىمعا سىلتەمە جاساي وتىرىپ تالدايدى.
2021 -جىلى BMW قوزعالتقىشى جانە بەنزينمەن جۇرەتىن AirCar كولىگى سلوۆاكيانىڭ ەكى اۋەجايىنىڭ اراسىندا 35 مينۋتتا ۇشىپ بارعانى بەلگىلى. بۇل تەحنولوگيا بويىنشا كولىكتەن ۇشاققا اۋىسۋعا ەكى مينۋت قانا ۋاقىت كەرەك. ەندى وسى تەحنولوگيانىڭ نەگىزىندە جاسالعان كولىكتەر قىتايدىڭ «بەلگىلى ءبىر گەوگرافيالىق ايماعىندا» جۇمىس ىستەيتىن بولادى.
شتاب-پاتەرى كانجوۋ قالاسىندا ورنالاسقان Hebei Jianxin Flying Car Technology كومپانياسى AirCar ۇشاقتارىن قىتايدا وندىرۋگە جانە پايدالانۋعا ەرەكشە قۇقىقتاردى ساتىپ الدى.
كومپانيا ءوزىنىڭ اۋەجايى مەن ۇشۋ مەكتەبىن باسقا سلوۆاكيالىق ۇشاق وندىرۋشىسىنەن بۇرىنىراق ساتىپ العاننان كەيىن سالعان. بۇل تۋرالى AirCar-دى جاساعان KleinVision كومپانياسىنىڭ نەگىزىن قالاۋشى انتون زاياك مالىمدەدى.
ەلەكترلى كولىك رەۆوليۋتسياسىنىڭ كوشىن باستاعان قىتاي قازىر ۇشاتىن كولىككە ارنالعان شەشىمدەردى بەلسەندى تۇردە ازىرلەۋدە. وتكەن ايدا Autoflight كومپانياسى شىنجىن مەن جۋحاي قالالارى اراسىندا جولاۋشىلار تاسيتىن ۇشقىشسىز ۇشاقتى سىناقتان وتكىزدى. بورتىندا جولاۋشى بولماسا دا، كولىكپەن ءۇش ساعاتقا سوزىلاتىن جولدى ۇشاق 20 مينۋتتا ۇشىپ وتكەن. ال 2023 -جىلى قىتايلىق eHang كومپانياسى قىتايلىق شەنەۋنىكتەردەن ءوزىنىڭ ەلەكترلى ۇشاتىن تاكسيى ءۇشىن قاۋىپسىزدىك سەرتيفيكاتىن الدى.
ۇلى بريتانيا ۇكىمەتى 2028 -جىلعا قاراي ۇشاتىن تاكسيلەر اسپانداعى قاراپايىم كورىنىسكە اينالۋى مۇمكىن ەكەنىن ايتۋدا. ءبىراق AirCar كولىگى درون ءتارىزدى تىگىنەن كوتەرىلمەيدى نەمەسە قونبايدى، وعان ارنايى ۇشۋ-قونۋ جولاعى قاجەت.
KleinVision تەحنولوگيانى قانشاعا ساتقانىن ايتۋدان باس تارتقان. AirCar كولىگى 2022-جىلى سلوۆاكيانىڭ كولىك باسقارماسىنان ۇشۋعا جارامدىلىق سەرتيفيكاتىن الدى جانە وسى جىلدىڭ باسىندا YouTube پلاتفورماسىندا جاريالانعان ۆيدەودا كورسەتىلدى.
بۇل كولىك تۇرىنە ينفراقۇرىلىم، رەتتەۋ جانە تەحنولوگيانى قوعامدىق قابىلداۋ تۇرعىسىنان ءالى دە ايتارلىقتاي كەدەرگىلەر بار.
«جەكە تاسىمالداۋدىڭ بۇل باتىل جاڭا الەمى كەرەمەت قىزمەت ەتەدى. باتىس كەيدە وسىعان بايلانىستى ىستەردى باسەڭدەتۋى مۇمكىن. قىتاي مۇنى العا ۇمتىلۋ مۇمكىندىگى رەتىندە قاراستىرۋدا»، - دەيدى اۆياتسيالىق كەڭەسشى ستيۆ رايت.
وسىعان ۇقساس الاڭداۋشىلىقتار ءبىر كەزدەرى قىتاي الەمدىك نارىقتا كوشباسشىعا اينالعان ەلەكتر كولىكتەرىنە دە قاتىستى ايتىلعان. سلوۆاكيانىڭ AirCar كولىگىنىڭ ساتىلۋى قىتايدىڭ ۇشاتىن كولىكتەر سەگمەنتىندە دە كوشباسشى بولۋعا ۇمتىلىسىن كورسەتەدى.