ەۋروپادا اپتاپ ىستىق: فرانسيا مەن يسپانيادا العاشقى ءولىم تىركەلدى

استانا. KAZINFORM - جەرگىلىكتى بيلىك وكىلدەرىنىڭ مالىمەتىنشە، فرانسيادا ەكى ادام اپتاپ ىستىقتان السىرەۋ سالدارىنان كوز جۇمعان. سونىمەن قاتار، يسپانيادا دا العاشقى ءولىم جاعدايلارى تىركەلدى، دەپ حابارلادى Kazinform اگەنتتىگىنىڭ مەنشىكتى ءتىلشىسى.

2 -شىلدە كۇنى تەمپەراتۋرا شارىقتاۋ شەگىنە جەتەدى دەپ كۇتىلەدى.

فرانسيا بيلىگى ەل تاريحىنداعى ەڭ ىستىق ماۋسىمداردىڭ ءبىرى بولعانىن حابارلادى. Météo France ۇلتتىق مەتەورولوگيالىق قىزمەتىنىڭ دەرەكتەرىنە سايكەس، ماۋسىم ايىنىڭ ورتاشا تەمپەراتۋراسى قالىپتىدان 3,3°C جوعارى بولعان.

- 2025 -جىلدىڭ ماۋسىمى - 1900 -جىلدان بەرى تىركەلىپ كەلە جاتقان كورسەتكىشتەر بويىنشا، 2003 -جىلعى ماۋسىمنان كەيىنگى ەڭ ىستىق اي بولادى، - دەدى فرانسيانىڭ ەكولوگيا ءمينيسترى انەس پانە-ريۋناشە سارسەنبى كۇنى تاڭەرتەڭ جۋرناليستەرگە.

2 -شىلدە، سارسەنبى كۇنى اپتاپ ىستىقتان العاشقى ءولىم فاكتىلەرى تىركەلدى. فرانسيادا ەكى ادامنىڭ جوعارى تەمپەراتۋرا سالدارىنان السىرەپ كوز جۇمعانىن ەكولوگيا ءمينيسترى انەس پانە-ريۋناشە BFM جەرگىلىكتى تەلەارناسىنا راستادى. ونىڭ ايتۋىنشا، ءورت سوندىرۋشىلەر 300 دەن استام ادامعا مەديتسينالىق كومەك كورسەتكەن.

يسپانيادا دا اپتاپ ىستىقتان قايتىس بولعان العاشقى جاعدايلار تىركەلدى: ەلدىڭ وڭتۇستىك-شىعىس وڭىرىندە ەكى جاسار بالا اتا- اناسى بىرنەشە ساعات بويى كولىكتە قالدىرىپ كەتكەننەن كەيىن كوز جۇمعان. سونىمەن قاتار، جەرگىلىكتى ءورت سوندىرۋشىلەر لەريدا پروۆينتسياسىندا ىستىقتان بولعان ءورت سالدارىنان ەكى ادامنىڭ ءمايىتىن تاپقان.

فرانسياداعى بيىلعى جىلدىڭ العاشقى اپتاپ ىستىق تولقىنى تۋرالى تولىعىراق اقپاراتتى وسى جەردەن وقي الاسىز.