ەۋروپاعا بال ەكسپورتتاۋعا رۇقسات الدىق - مينيستر

استانا. KAZINFORM - قازاقستان ەۋروپا ەلدەرىنە بال ەكسپورتتاۋعا رۇقسات الدى. اۋىل شارۋاشىلىعى ءمينيسترى ايداربەك ساپاروۆ ۇكىمەت وتىرىسىندا وسىنداي مالىمەت ايتتى.

- بۇگىندە ەۋروپا ەلدەرىنىڭ تىزىلىمىندە 62 قازاقستاندىق كاسىپورىن تىركەلگەن. بيىل قازاقستان ە و ەلدەرىنە بال ەكسپورتتاۋعا رەسمي رۇقسات الدى. سونداي-اق اكۆاكۋلتۋرا، جىلقى ەتى جانە ءسۇت ونىمدەرىن ەكسپورتتاۋعا جول اشۋ باعىتىندا جۇمىس جۇرگىزىلىپ جاتىر، - دەدى ۆەدومستۆو باسشىسى.

ونىڭ سوزىنشە، قازىر ەلدەگى 2649 كاسىپورىن قىتايعا ءونىم ەكسپورتتاپ وتىر.

- 2025 -جىلى قىتايمەن قۇس ەتىنە قاتىستى ۆەتەريناريالىق تالاپتاردى بەلگىلەيتىن حاتتاماعا قول قويىلدى. گرۋزيامەن ەت باعىتىنداعى ءىرى قارا مەن قوي ەكسپورتى بويىنشا، يرانمەن تۇياقتى مال ءجۇنىنىڭ ەكسپورتى بويىنشا ۆەتەريناريالىق سەرتيفيكاتتارعا قول قويىلدى. تۇركيا، اۋعانستان جانە پاكىستانمەن نارىقتاردى كەڭەيتۋ بويىنشا كەلىسسوزدەر جالعاسىپ جاتىر، - دەدى ايداربەك ساپاروۆ.

بۇعان دەيىن قازاقستاندا اۋىل شارۋاشىلىعىن سيفرلاندىرۋ قالاي ءجۇرىپ جاتقانىنا شولۋ جاساعان ەدىك.