ءوز حاتىندا ماكرون ورمۋز بۇعازىنىڭ ۇزاق ۋاقىت بويى جابىق بولۋى جانە تاياۋ شىعىستاعى ەنەرگەتيكالىق ينفراقۇرىلىمعا جاسالعان شابۋىلداردىڭ قايتا كۇشەيۋى الەمدىك مۇناي نارىعىنداعى جاعدايدى قيىنداتىپ وتىرعانىن اتاپ وتكەن.
فرانسيا پرەزيدەنتىنىڭ ايتۋىنشا، وسىعان دەيىن مۇناي نارىعىنداعى تاپشىلىق مۇناي وڭدەۋ كولەمىن ارتتىرۋ، ازياداعى سۇرانىستىڭ تومەندەۋى جانە جيناقتالعان قورلاردى پايدالانۋ ەسەبىنەن وتەلىپ كەلگەن. الايدا بۇل مۇمكىندىكتەر بىرتىندەپ تاۋسىلىپ بارادى. فرانسۋز ۇكىمەتىنىڭ مالىمەتىنشە، 22-قىركۇيەك كۇنى تاڭەرتەڭ ەلدەگى جانارماي بەكەتتەرىنىڭ شامامەن %14 ىندا وتىن تاپشىلىعى نەمەسە تاپشىلىققا جاقىن جاعداي تىركەلگەن.
ماكروننىڭ باعالاۋىنشا، ورمۋز بۇعازى ءىس جۇزىندە جابىق كۇيدە قالىپ، ساۋد ارابياسىنىڭ «شىعىس-باتىس» مۇناي قۇبىرى جۇمىسىن قايتا باستاماسا، الەمدىك نارىقتاعى مۇناي جەتكىزىلىمى تاۋلىگىنە تاعى كەمىندە 4 ميلليون باررەلگە قىسقارۋى مۇمكىن. بۇل مۇناي باعاسىنىڭ كۇرت وسۋىنە اكەلۋى ىقتيمال. ونىڭ حاتىندا الەمدىك مۇناي قورى 500 ميلليون باررەلدەن استام ازايعانى ايتىلعان.
فرانسيا پرەزيدەنتى ەۋروپانىڭ تاياۋ شىعىستان يمپورتتالاتىن اۆياتسيالىق وتىنعا تاۋەلدىلىگى %36، ديزەل وتىنىنا تاۋەلدىلىگى %18 ەكەنىن اتاپ ءوتتى.
تىعىرىقتان شىعار جول
ماكرون ەۋروپالىق وداق جوعالعان شيكى مۇناي كولەمىن قىسقا مەرزىمدە تولىق الماستىرا المايتىنىن، الايدا قولدا بار شيكىزات پەن مۇناي وڭدەۋ قۋاتىن ءتيىمدى پايدالانۋ ارقىلى مۇناي ونىمدەرىنىڭ ءوندىرىسىن ارتتىرا الاتىنىن ايتتى.
ول ەۋروپالىق كوميسسيانى وتىن ساپاسىنا قويىلاتىن كەيبىر تالاپتاردى ۋاقىتشا جەڭىلدەتۋگە شاقىردى. بۇل مۇناي وڭدەۋ زاۋىتتارىنا اۆياتسيالىق كەروسين مەن ديزەل وتىنىن كوبىرەك وندىرۋگە مۇمكىندىك بەرەدى.
ماكروننىڭ ايتۋىنشا، وتىننىڭ تىعىزدىعى، بۋلانعىشتىعى جانە كۇكىرت مولشەرى سياقتى پارامەترلەردى وزگەرتۋ جەكەلەگەن زاۋىتتاردا ءوندىرىس كولەمىن شامامەن %5-20 عا ارتتىرۋى مۇمكىن.
سونىمەن قاتار فرانسيا ە و اۋماعىندا قۇرامىندا %10 عا دەيىن بيووتىن بار B10 ديزەلىن كەڭىنەن پايدالانۋعا رۇقسات بەرۋدى ۇسىندى. بۇل ءۇشىن اۆتوكولىك وندىرۋشىلەرىمەن بىرلەسىپ، قانداي قوزعالتقىشتاردىڭ مۇنداي وتىنمەن قاۋىپسىز جۇمىس ىستەي الاتىنىن انىقتاۋ ۇسىنىلادى.
ماكروننىڭ پىكىرىنشە، اتالعان شارالار گەوساياسي احۋالدىڭ تۇراقتانۋىن كۇتپەي-اق، ەۋروپاعا وتىن جەتكىزۋ كولەمىن ارتتىرۋعا مۇمكىندىك بەرەدى.
ەسكە سالا كەتسەك، بۇعان دەيىن ساۋد ارابياسى «شىعىس - باتىس» مۇناي قۇبىرىنىڭ جۇمىسىن قايتا باستاعانى تۋرالى جازدىق.