بۇل تۋرالى ب ۇ ۇ جاڭالىقتار قىزمەتى حابارلادى.
قارجىلىق شىعىن مەن ۇشاقتاردىڭ قونۋ كەزەگىندە كۇتۋ ۋاقىتىن ازايتۋ ءۇشىن حالىقارالىق ازاماتتىق اۆياتسيا ۇيىمى (ي ك ا و) ۇشۋلاردى ۇيلەستىرۋدىڭ جاھاندىق جۇيەسىن ەنگىزۋدى ۇسىنىپ وتىر.
ەۋروپالىق اۋە قوزعالىسىن باسقارۋ ۇيىمى EUROCONTROL مالىمەتىنشە، شىعىننىڭ باسىم بولىگى اۋە قوزعالىسىن ۇيىمداستىرۋعا بايلانىستى رەيستەردىڭ كەشىگۋىنەن تۋىنداعان.
كەڭ تارالعان ماسەلەلەردىڭ ءبىرى - اۋە كەڭىستىگىندەگى كەپتەلىس. ۇشاقتار قونۋعا رۇقسات كۇتىپ، اۋەجايلاردىڭ ۇستىندە اينالىپ ۇشۋعا ءماجبۇر بولادى. سونىمەن قاتار قولايسىز اۋا رايى، توتەنشە جاعدايلار مەن جەكەلەگەن باعىتتاردىڭ جابىلۋى رەيستەر كەستەسىنىڭ بۇزىلۋىنا اكەلۋى مۇمكىن. مۇنداي جاعدايلار ماسەلە تۋىنداعان جەردەن مىڭداعان شاقىرىم قاشىقتىقتاعى اۋە قاتىناسىنا دا اسەر ەتەدى.
بۇل ماسەلەنى شەشۋ ءۇشىن يكاو اۋە قوزعالىسى اعىندارىن باسقارۋ جۇيەسىن كەڭىنەن قولدانۋدى ۇسىنىپ وتىر. ول اۋەجايلار، اۋە كومپانيالارى، ديسپەتچەرلىك جانە مەتەورولوگيالىق قىزمەتتەر اراسىندا ناقتى ۋاقىت رەجيمىندە اقپارات الماسۋدى كوزدەيدى.
اتاپ ايتقاندا، اۋەجاي قوسىمشا رەيستەردى قابىلداي المايتىنىن الدىن الا بىلسە، باسقا اۋەجايلاردان ۇشاتىن ۇشاقتاردىڭ ساپارىن ۋاقىتشا كەيىنگە شەگەرۋگە بولادى. بۇل اۋە كەمەلەرىنىڭ قونۋ كەزەگىندە اۋادا كۇتۋ ۋاقىتىن قىسقارتۋعا مۇمكىندىك بەرەدى.
يكاو باس حاتشىسى حۋان كارلوس سالاساردىڭ ايتۋىنشا، ەلدەر اراسىنداعى ۇيلەستىرۋدىڭ جەتكىلىكسىزدىگى رەيستەردىڭ كەشىگۋىنە سەبەپ بولىپ، اۋە قاتىناسىن قالىپتى جاعدايعا كەلتىرۋدى قيىنداتادى.
جاڭا ءتاسىلدىڭ تيىمدىلىگى تاجىريبە جۇزىندە دالەلدەنگەن. 2026-جىلى سولتۇستىك جانە وڭتۇستىك امەريكادا جۇرگىزىلگەن بىرلەسكەن سىناقتار ناتيجەسىندە ۇشۋ ۋاقىتى 265 مىڭ مينۋتتان استامعا، ياعني شامامەن 4,4 مىڭ ساعاتقا قىسقارعان. سونىمەن قاتار 38,9 ميلليون دوللاردان استام قاراجات ۇنەمدەلگەن.
بۇدان بولەك، جانارماي شىعىنى شامامەن 13,3 مىڭ تونناعا ازايىپ، اتموسفەراعا 42,1 مىڭ توننا كومىرقىشقىل گازىنىڭ تارالۋىنا جول بەرىلمەگەن.
ەۋروپادا اۋا رايى مەن اۋە كەڭىستىگىنىڭ جۇكتەمەسىن الدىن الا بولجاۋ ارقىلى 2026 -جىلعى مامىردان تامىزعا دەيىن جالپى ۇزاقتىعى شامامەن 3,1 ميلليون مينۋت بولاتىن رەيس كەشىگۋلەرىنىڭ الدىن الۋعا مۇمكىندىك تۋعان. ەكونوميكالىق تيىمدىلىك 448 ميلليون دوللار دەپ باعالانىپ وتىر.
سونىمەن بىرگە ي ك ا و وكىلدەرى نەگىزگى كەدەرگىلەردىڭ ءبىرى ۇلتتىق اۋە قوزعالىسىن باسقارۋ جۇيەلەرى اراسىندا اقپارات الماسۋدىڭ جەتكىلىكسىزدىگى ەكەنىن اتاپ ءوتتى.
اۋە قوزعالىسى اعىندارىن باسقارۋدىڭ جاڭا حالىقارالىق ەرەجەلەرى 2030-جىلعى قاراشادا كۇشىنە ەنەدى دەپ كۇتىلۋدە. ولاردى ەنگىزۋ ماسەلەلەرى بويىنشا وڭىرلىك سەمينارلار 2027-جىلعا جوسپارلانعان.
ي ك ا و بولجامىنشا، 2050-جىلعا قاراي الەمدەگى اۋە جولاۋشىلارىنىڭ سانى 12,4 ميلليارد ادامعا جەتۋى مۇمكىن. بۇل حالىقارالىق اۋە رەيستەرىن ۇيلەستىرۋدىڭ تيىمدىلىگىن ارتتىرۋدى تالاپ ەتەدى.
بۇعان دەيىن ۇلىبريتانيادا اۋە قوزعالىسىن باسقارۋ جۇيەسىندەگى بىرنەشە ساعاتقا سوزىلعان اقاۋعا بايلانىستى شامامەن ەكى مىڭ رەيس توقتاتىلعانى حابارلانعان بولاتىن. تەحنيكالىق اقاۋ سالدارىنان جۇزدەگەن مىڭ جولاۋشى زارداپ شەگىپ، جاپپاي كەشىگۋلەر تىركەلدى. الدىن الا ەسەپ بويىنشا، بۇل جاعداي اۋە كومپانيالارىنا ميلليونداعان فۋنت ستەرلينگ شىعىن اكەلگەن.