ونىڭ سوزىنشە، قازاقستان مەن ەۋروپالىق وداق الداعى ءۇش جىلعا ارنالعان جول كارتاسىن بەكىتۋدى جوسپارلاپ وتىر. قۇجاتتا تاراپتاردىڭ بىرلەسىپ وتكىزەتىن ءىس-شارالارى قامتىلادى.
سونىڭ ىشىندە ۆيزالىق ماسەلەلەرگە دە باسىمدىق بەرىلگەن. بۇل باعىتتا ەۋروپالىق كوميسسيامەن ءتيىستى جۇمىس جۇرگىزىلىپ جاتىر.
- ارينە، بولاشاقتا ۆيزاسىز رەجيمگە قول جەتكىزەمىز دەگەن ءۇمىت بار. ءبىراق قازىر ءبىرىنشى كەزەكتە ۆيزا الۋ راسىمدەرىن جەڭىلدەتىپ، قاجەتتى قۇجاتتار سانىن ازايتۋدى كوزدەپ وتىرمىز، - دەدى مۇحتار تىلەۋبەردى.
ءمينيستردىڭ ايتۋىنشا، قازاقستان مەن بەلگيا اراسىنداعى ىنتىماقتاستىق ەكونوميكالىق بايلانىستارمەن شەكتەلمەيدى. تاراپتار مادەنيەت، سالت-ءداستۇر، ءبىلىم جانە عىلىم سالالارىنداعى ارىپتەستىكتى دە كەڭەيتۋدى جوسپارلاپ وتىر.
وسى ورايدا ەرتەڭگى بيزنەس-فورۋمدا 17 كوممەرتسيالىق كەلىسىمگە قول قويۋ كوزدەلگەن. ال ۋنيۆەرسيتەت رەكتورلارىنىڭ كەزدەسۋىندە ءبىلىم جانە عىلىم سالاسىنداعى ىنتىماقتاستىققا قاتىستى 24 كەلىسىمگە قول قويىلادى دەپ جوسپارلانىپ وتىر.
بۇدان بولەك، ەكى ەلدىڭ سىرتقى ىستەر مينيسترلىكتەرى اراسىنداعى كونسۋلتاتسيالار بارىسىندا ىنتىماقتاستىقتىڭ جاڭا باعىتتارى ايقىندالماق. قازىر جاساندى ينتەللەكت پەن تسيفرلاندىرۋ سالاسىنداعى ارىپتەستىكتى نىعايتۋ ماسەلەسىنە دە نازار اۋدارىلىپ وتىر.
ايتا كەتەيىك، بەلگيانىڭ 600 جىلدىق تاريحى بار ۋنيۆەرسيتەتى قازاقستاندا «سيرەك مەتالداردى بايىتۋ» ورتالىعىن اشادى.
بۇعان دەيىن بەلگيالىقتار كورولى فيليپپ قازاقستاننىڭ باي تاريحىمەن جانە مادەنيەتىمەن جاقىن تانىسۋعا نيەتتى ەكەنىن ايتقان ەدى.
ءوز كەزەگىندە مەملەكەت باسشىسى قاسىم-جومارت توقايەۆ قازاقستان مەن بەلگيا اراسىندا شەشىلمەگەن ماسەلە جوق ەكەنىن مالىمدەدى.