ەۋروپا وداعىمەن كەلىسسوز: ۆيزا بويىنشا قانداي جەڭىلدىكتەر ەسكەرىلىپ وتىر
استانا. KAZINFORM - ەۋروپا وداعىنىڭ قازاقستانعا ۆيزا رەجيمىن جەڭىلدەتۋگە ارنالعان قۇجات جوباسىندا قانداي تالاپتار ۇسىنىلىپ وتىر؟ بۇل سۇراققا سىرتقى ىستەر مينيسترلىگى جاۋاپ بەردى.
- 2025 -جىلعى 27 -ناۋرىزدا ەۋروپا وداعىنا مۇشە مەملەكەتتەر قازاقستانمەن ۆيزا بەرۋدى جەڭىلدەتۋ جونىندەگى كەلىسىمدى جاساۋ ءۇشىن ەۋروپالىق كوميسسيانىڭ مانداتىن ماقۇلدادى. قازاقستان - ەۋروپا وداعىمەن ۆيزالىق رەجيمدى جەڭىلدەتۋ تۋرالى كەلىسسوزدەردى باستايتىن ورتالىق ازياداعى العاشقى مەملەكەت. بۇل - ەكى تاراپ اراسىنداعى سەنىم مەن ستراتەگيالىق سەرىكتەستىكتىڭ ايقىن بەلگىسى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
اتاپ ايتقاندا، كەلىسسوزدەر ۆيزالىق رەجيمنىڭ نەگىزگى اسپەكتىلەرىن قامتيدى. بۇل تۇرعىدا وتىنىشتەردى قاراستىرۋ مەرزىمدەرىن قىسقارتۋ، ۆيزا قۇنىن تومەندەتۋ، ارتىقشىلىقتى ساناتتاردى كەڭەيتۋ، قۇجاتتارعا قويىلاتىن تالاپتاردى جەڭىلدەتۋ، سونداي- اق ۇزاق مەرزىمدى كوپ مارتەلىك ۆيزالاردى الۋ مۇمكىندىكتەرىن ارتتىرۋ.
- بۇل وزگەرىستەر وتانداستارىمىزدىڭ ەۋروپاعا ساپارلارىن جەڭىلدەتىپ، بيزنەس، عىلىم جانە مادەني الماسۋعا جاڭا مۇمكىندىكتەر اشادى، - دەپ اتالىپ وتكەن ۆكدومستۆو اقپاراتىندا.
ەسكە سالساق، 2023 -جىلى قازاقستان مەن ە و ۆيزا رەجيمىن جەڭىلدەتۋ بويىنشا رەسمي كەلىسسوزدەردى باستايتىنىن جازعان ەدىك.
بۇدان بۇرىن حابارلانعانداي، بيىل ناۋرىز ايىنىڭ اياعىندا قازاقستان پرەزيدەنتى قاسىم-جومارت توقايەۆ ەۋروپا وداعىنىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى - ەۋروپالىق كوميسسيانىڭ ۆيتسە- پرەزيدەنتى كايا كاللاسپەن كەزدەستى.
ە و جوعارعى وكىلى ك. كاللاس ەۋروپالىق كوميسسيا مەن قازاقستان اراسىندا ۆيزا بەرۋ ءتارتىبىن جەڭىلدەتۋ جونىندەگى كەلىسىمدى بەكىتۋ ۇدەرىسى باستالعانىن ايتتى.